Коронавирус пандемиятынан харыстанан, дьиэҕэ олоро кэмнэрин Эдьигээн улууһун олохтоохторо Вензеллэр дьиэ кэргэттэрэ бэрт интэриэһинэйдик атаараллар.
edersaas.ru
Ыал ийэтэ Наталья Вензель — улуустааҕы ускуустуба оскуолатын уруһуй салаатын уһуйааччыта. Аҕалара Максим Иванович Эдьигээннээҕи баһаарынай чаас караулун салайааччыта. Үс оҕолоох эдэр ыал улахан уоллара Эрик сэттис кылааска, кыыстара Сардаана бэһис кылааска үөрэнэллэр. Оҕо уһуйаанын итиллээччитэ Саша — үс саастаах.
Наталья Александровна билигин үөрэнээччи оҕолоро тэйиччиттэн олорон үөрэнэллэригэр көмөлөһөр.
— Сибээс мөлтөх буолан, интэриниэт эмиэ суоҕун тэҥэ. Ол да буоллар, төһө кыалларынан үөрэтэ, үөрэнэ сатыыбыт, биир да сорудаҕы көтүппэппит, — диэн кэпсиир ыал ийэтэ.
Вензеллэр дьиэ кэргэн иллэҥ кэмнэригэр оҕолорун кытта араас аһы астыыллар.
Ону кытта сибэкки, оҕуруот аһын олордоллор. Дьиэ кэргэнинэн уруһуйдуулларын сөбүлүүллэр, кинигэ ааҕаллар.
Кыыстара Сардаана дьиэҕэ олорор кэмигэр ийэтин сүбэтинэн иистэнэргэ үөрэннэ.
Улахан уол эһэтин, аҕатын кытта илим баайарга үөрэнэр буоллаҕына, кырачаан Саша ас астыырга эрэллээх көмөлөһөөччү.
«Саха сирэ» хаһыат, edersaas.ru анаан Ирина БУРЦЕВА,
Эдьигээн улууһа.