Бэҕэһээ, субуотаҕа, Дьокуускайга Арчы дьиэтигэр үгэскэ кубулуйбут “Оо, собо барахсан!” дьоро киэһэ буолан ааста. Көмүс хатырыктаахха сүгүрүйэр тэрээһин биир күүтүүлээх, кэрэхсэбиллээх түгэнэ – “Саамай улахан собо” күрэстэһии.
edersaas.ru
Быйылгы кыайыылааҕынан Эдьигээн улууһун Оруктаах күөлүттэн бултаммыт 2 киилэ 359 кыраамнаах, 44 см уһуннаах собо ааттанна. Бу собону Эдьигээн олохтооҕо, 77 сааһын туолаары сылдьар Петр Петров илдьэ кэлбит. Оттон Бүлүү Үгүлээтин икки бөдөҥ собото иккис-үһүс миэстэлэннилэр: Махаар Күһүтэ күөлүттэн кэлбит 2 киилэ 182 кыраамнаах, 41 см уһуннаах көмүс хатырыктааҕы Николай Афанасьев уонна Күндэ 2 киилэ 5 кыраамнаах, 42 см уһуннаах балыгын Акулина Алексеева аҕалбыттар.
“Бу собону сиэннэрим быйыл күһүн муус аннынан илимнээн ылбыттара, — диир Петр Афанасьевич. – Кинилэр маннык күрэхтэһии ыытылларын билэр буоланнар, миэхэ кыттарбар анаан-минээн биэрбиттэрэ. Сиэним Петр Владимиров быйыл аармыйаттан кэлэн баран, Дьокуускайга Автодорожнай институкка үөрэнэ сылдьар. Өрүс туруон иннинэ убайын кытта илимнээбиттэрэ. Оруктаах диэн улахан күөл, бөдөҥ, эмис соболооҕунан биллэр, үгүлээттэр соболоро биһиэнигэр маарынныыр эбит. Эдьигээҥҥэ билигин муҥханы салайар-дьаһайар кырдьаҕастар суох буоланнар, муҥхалаабаттар, биирдиилээн дьон илимнииллэр эрэ”.
Кини бэйэтэ Бүлүү Мастааҕыттан төрүттээх эбит, Эдьигээҥҥэ олохсуйбута аҕыйах сыл буолбут. Тэрийээччилэр бастаабыт собону аукциоҥҥа туруорбуттарын Дьокуускай олохтооҕо Мария Петровна Винокурова 7 мөһөөххө атыыласта. “Саҥа дьылга духовкаҕа буһаран, дьоммун күндүлүөм”, — диир Үөһээ Халыматтан тардыылаах далбар хотун.
Санатан эттэххэ, ааспыт сылларга саамай бөдөҥ собо аукциоҥҥа 3-4 тыһ. тахса солкуобайга барыталаабыта. “Быйыл тэрээһинтэн быыс булбакка, бэйэм кыайан хонтуруоллаабатым. Хаамыытын олус ыксаллаахтык ыытаннар таппатылар, дьон өйдөөмүнэ даҕаны хаалла быһыылаах”, — диэн дьоро киэһэни тэрийээччилэртэн биирдэстэрэ, Собо күнүн олохтуур идиэйэни көҕүлээччи, “Байанай” сурунаалы тэрийэн таһаарааччы Юрий Борисов санаатын үллэһиннэ. Оттон Петр Петров этэринэн, аукцион тоҕо эрэ дьон тарҕаһан, дьиэлээн эрдэҕинэ тэриллибит. «Аҕыйах тыһыынчаҕа барбыта буоллар, устудьуон уолга эбиискэ буолуохтаах этэ», — диир кырдьаҕас.
Василий НИКИФОРОВ,edersaas.ru