Эдьигээн олохтоохторо сыллата кэтэһэр, улаханнык сэргэхсийэр тэрээһиннэрэ — муус аннынан балыктааһыҥҥа күрэхтэһии быйыл да олус бэртээхэйдик, сэргэхтик ыытыллыбыт.
Бу туһунан «Эдьигээн сонуннара» олохтоох дьаһалта саайтыгар күрэс сүрүн судьуйата Юрий Шамаев сырдаппытын билиһиннэрбит. ХVI төгүлүн ыытыллар күрэхтэһии оройуоҥҥа физкултуура уонна успуорт сылын чэрчитинэн Балаҕаннаах боротуохатыгар ыытыллыбыт. «Мормышка-2021» күөн күрэһи тэрийээччилэринэн «WhatsApp» — «Хотугу хоhууттар» социальнай ситим бөлөҕүн чилиэннэрэ буолбуттар. Ох курдук оҥостон, тэринэн кэлбит хамаандалар күрэхтэһиигэ эрбии тииһин курдук эгил-тэгил киирсибиттэр, илик-кэлин түһүспүттэр.
—Быйылгы күрэс саамай түргэн балыксытынан Эдьигээн оскуолатын үөрэнээччитэ, «Федотовтар» хамаандаларын чилиэнэ Тимур Федотов буолан дьонун-сэргэтин улаханнык үөртэ. Көрдөрүүтэ 9 мүнүүтэ 05 сөкүүндэ. Ойбону бастакынан алларан, 2 кг 085 гр сордоҥу хаптарда. Тимурга Эдьигээн дьаһалтатын (баһылык Сорокин В.Н.) бирииһэ дохсун ытыс тыаһыгар доҕуһуоллатан туттарылынна. «Щукарь» анал аакка кыайыылаах буолар иһин, иккилии сордоҥу хаптарбыт Анатолий Элляев, Вячеслав Иванов, Любовь Петрова күрэхтэстилэр. Бу күрэскэ хаптарбыт сордоҥнорун ахсаана тэҥ буоллаҕына, балыктары ыйааһынныыллар. Ол түмүгэр, «Клевая FISH’KA» хамаанда чилиэнэ Вячеслав Иванов кыайыылааҕынан таҕыста. Балыгын ыйааһына 4 кг 160 гр. Кини «Клевая рыбалка» ютуб-ханаал блогера, спонсор Вячеслав Бродников бирииһин тутта. «Удачливый рыболов» анал аат кыайыылааҕар, «Непобедимые» хамаанда чилиэнигэр Семен Евсеевка (8 балыктаах) Эдьигээн дьаһалтатын бирииһэ туттарылынна. «Рыбак рыбака» номинацияҕа Эдьигээн оскуолатын үөрэнээччитэ, «ДЮСШ» хамаандатын чилиэнэ Артур Гуменюк тэҥнээҕин булбата. Сордоҥун ыйааһына 3 кг 095 гр. Спонсор күрэхтэһиини тэрийээччи Ю.Е. Шамаев. «Сыаналаах экземпляр» кыайыылааҕынан «Клевая FISH’KA» хамаанда чилиэнэ Гульмира Камбарбаева буолла. Гульмира туттарбыт майаҕаһа — 0,790 кг. Спонсор «Эдьигээн эбэҥки национальнай оройуона» МО дьаһалтата (баһылык А.Е.Мандаров). «Малёк-2021» күрэскэ биирдии алыһардаах «Үргэл» хамаанда сэттэ саастаах чилиэнэ Данил Петров уонна «Клевая FISH’KA» хамаанда аҕыс саастаах чилиэнэ Тимур Липаев кытыннылар. Манна кыайыылааҕынан Тимур Липаев буолла. Спонсор- Эдьигээн орто оскуолата (дириэктэр Д.А.Петрова). Балыксыт далбарга «Федотовтар» хамаандаларыттан Виктория Федотова бастаата. Күрэхтэһиини тэрийсээччи, спонсор А.А.Шадрин бирииһэ туттарылынна. «Скоростной бурильщик» диэн анал ааты былдьаһыыга Тимур Федотов, Семен Евсеев уонна Иннокентий Петров («Эрэл» хамаанда чилиэнэ) күрэхтэстилэр. Бу күрэскэ Иннокентий Петров инники күөҥҥэ түстэ. Бэлиэтээн эттэххэ, муус халыҥа быйыл манна 170-тан 200 см диэри. Ойбону алларыы балачча ыарахана өйдөнөр. Спонсор В.В.Тарасенко тус бирииһэ туттарылынна (100 лиитэрэ А-92 бэнсиин). «Саамай кыра балык» номинацияҕа кыра алыһардары туттарбыт Виктория Федотова уонна Марина Ким, «Колобоктар» хамаанда чилиэнэ, кытыннылар. Манна ыйааһыннаабакка, балыгы мээрэйдээһининэн Марина Ким кыайыылаах буолла. Спонсор, күрэхтэһиини тэрийсээччи М.И.Ефимов. «Зимний забег рыбака» быһый атахтаахтар күрэстэригэр Владимир Петров (Эдьигээн орто оскуолатын хамаандата), Тимур Федотов уонна игирэлэр Артур, Богдан Гуменюктар күрэхтэстилэр. 100 миэтэрэҕэ балыксыт малын-салын (дьааһык уонна мууһу алдьатар тэрил) сүгэн баран сүүрүүгэ 21,07 сөк. кэлэн Тимур Федотов инникилээтэ. Кини күрэхтэһиини тэрийсибит А.Ф.Матвеев спонсордаабыт бирииһин тутта. Маны сэргэ, «Үгэскэ бэриниилээх буолуу иһин» анал аат кыайыылааҕынан «Афанасьевтар» хамаандалара» буолла. Кинилэр 2005 сылтан күрэхтэһиини көтүппэккэ кытталлар. Хамаандаҕа иллээх ыал аҕата Анатолий Семенович, күн күбэй ийэ Лена Федоровна уонна уоллара Дима киирэллэр. Дима бу күрэскэ биэһиттэн кыттар уонна балык ыаматын туттарыыга бастакы кыайыылааҕынан буолар. Бириис спонсордара «Эдьигээн сонуннара» оройуон хаһыата уонна «ДЮСШ» МУДО дириэктэрэ А.Н.Иванов. «Кыайыыыга дьулуур иһин» — «Эрэл» уонна Эдьигээн орто оскуолатын хамаандатыгар туттарылыннылар. Бириис спонсордара «Лидер-Строй» маҕаһыын, дириэктэр Н.М.Аммосов. Ону таһынан, личнэй зачет кыттыылааҕар Т.А.Егороваҕа Уус Алдан улууһун Курбуһах нэһилиэгин баһылыга В.Н.Петров бирииһэ туттарылынна. Хамаандаларга туттарбыт балыктарын ыйааһынынан түмүк таһаарылынна. 3 бириистээх миэстэҕэ «Федотовтар» хамаандалара (хапытаан В.Ф.Федотова) таҕыста. Спонсор – «Саханефтегазсбыт» АУо Эдьигээннээҕи филиала (дириэктэр Н.Г.Филиппов). 2 миэстэҕэ «Клевая FISH’KA» хамаанда (хапытаан В.В.Иванов)тигистэ. Спонсор – «Биир ньыгыл Арассыыйа» партия Эдьигээннээҕи отделениета (салайааччы А.П.Егоров). 1 миэстэни «Непобедимые» хамаанда (хапытаан А.В.Элляев) ылла. Спонсор В.Н.Сорокина тус бирииһэ уонна күрэхтэһии кыайыылаах хамаандатыгар көһө сылдьар кубок туттарылынна, — диэтэ күрэхтэһии сүрүн судьуйата уонна тэрийээччи Юрий Шамаев.
Муус аннынан балыктааһын кыттыылаахтара уонна тэрийээччилэр бары спонсордарга олохтоох көҕүлээһини өйөөбүттэригэр махтаммыттар.
«Эдьигээн сонуннара», «Новости Жиганска»