Бүгүҥҥэттэн Хаҥалас улууһун «Орто Дойду» комплексыгар «ТАБЫС» ыччат бэстибээлэ саҕаланна. Бэстибээлгэ Саха сирин араас улуустарыттан уонна уопсастыбаннай тэриллиилэриттэн хамаандалар кэлэн күрэхтэһэн саҕалаатылар.
Бэстибээл иһинэн аан бастакытын ыытыллар «Эдэр маастар» диэн быыстапка ыытылла турар. Манна 19 улуустан уонна 5 уопсастыбаннай тэриллииттэн тарбаҕар талааннаах эдэр дьон үлэлэрин көрдөрө аҕаллылар. Тэрээһин сүрүн сыалынан төрүт оһуору-бичиги үйэтитии, саҥа ааттары таһаарыы буолар. Быыстапка кыттааччыларын үлэлэрин «Симэх» национальнай киин үлэһиттэрэ Радомира Баишева, Дмитрий Колодезников, Дьокуускайдааҕы художественнай училище преподавателэ Александра Неустроева уонна норуот маастара Вера Варфоломеева көрүөхтэрэ-истиэхтэрэ, сыаналыахтара.
Быыстапкаҕа Уус Алдан улууһун Суоттутуттан технология учуутала Роза Бубякина кытта кэлбит. Кини үлэлэрин туһунан маннык кэпсиир:
— Мин үлэлэрим бэйэ-бэйэлэригэр майгыннаспаттар, куруук уратыны оҥоробун. Байанай сылынан сибээстээн көтөрдөр кынаттарын оҥортообутум. Үс миэтэрэлээх кыталык кынатык оҥорбуппун «Бэйбэрикээн эмээхсин» киинэҕэ туттубуттара, онон олус диэн киэн туттабын. Кынаты оҥорорбор линолеум анныгар тэлгиир материалы кырыйан, бэйэ-бэйэлэригэр килиэйдиибин. Маннык ньыманан хотойу, улары, кубалары оҥорбутум. Биир кынакка 300 куорсуну кырыйабын. Оскуолаҕа учууталлаабытым биэс сыл буолла, оҕолорго анаан куруһуок үлэлэтэбин.
Нерюнгриттан эдэр аҕа, урбаанньыт Кэскил Софронеев ураты үлэлэри аҕалбыт. Кини мастан кыһан кыыллар скульптураларын оҥорор эбит. Кэскил үлэтин билиһиннэрэр:
—— Мин оҕо сылдьан уруһуй куруһуогар дьарыктаммытым. Онно оҥорон көрөр дьоҕурум сайдыбыт эбит. Бу тиит мастан кыыл моһуоннарын оҥорбуппун быыстапкаҕа аҕаллым. Маны оҥорорго бэнсиининэн барар эрбиини эрэ туһанабын уонна чаас аҥаарыттан саҕалаан күнү быһа да оҥоруохпун сөп. Хас биирдии оҥоһугум бэйэбэр дириҥ суолталаахтар.
Кыайыылаахтары түөрт хайысханан бүгүн киэһэ быһаарыахтара.
Айтана Аммосова, edersaas.ru