Бэҕэһээ СӨ Үөрэҕин уонна наукатын миниистирин эбээһинэһин толороччу Михаил Сивцевы кэлэктиипкэ, министиэристибэ иһинэн үлэлиир тэрилтэлэр дириэктэрдэригэр билиһиннэрбиттэрэ. Михаил Петровиһы үөрэппит учууталын суругун ааҕыаҕыҥ.
Учуутал суруга
Михаил Сивцев оҕо сааһа Уус Алдан улууһун Кэптэни бөһүөлэгэр ааспыта. Аҕалара эрдэ оһолго былдьанан, ыал улахан оҕотунан хаалбыта. Ийэтигэр көмө киһитэ буолан, икки быраатын, икки балтын көрөн улаатыннарсыбыта. Мин маны барытын көрбүт-истибит, идэни талыытыгар такайбыт учуутала буолабын.
Оччолорго, саха национальнай кэнсиэпсийэтин олоххо киллэрии үгэннээн турар кэмигэр, Лөгөй оскуолатын учууталларын бөлөҕө саҥа үөрэҕирии эспэримиэнин саҕалаабыппыт. Михаил Петрович үөрэммит кылааһа бу эспэримиэҥҥэ кыттан, араас биридимиэттэри дириҥэтэн үөрэппитэ. Манна кини бары биридимиэккэ дьоҕурдааҕын, дьулуурдааҕын көрдөрбүтэ. Тиэхиньиичэскэй, естественнэй, гуманитарнай хайысхаларга барытыгар тэҥинэн үчүгэй этэ. Араас биридимиэттэр олимпиадаларыгар ситиһиилээхтик кыттыбыта. Оскуоланы бүтэрэригэр өр толкуйдаан, СГУ „француз тыла уонна история“ идэтин талан, олус улахан куонкуруһу ааһан үөрэххэ киирбитэ. Маныаха Бельгияттан, эспэримиэн чэрчитинэн, Кэптэнигэ кэлбит бельгиец-учууталлар сабыдыаллара улахан буолуохтаах. Кинини француз тылыгар үрдүк категориялаах учуутал Валентина Ивановна Бурнашева умсугуппута, уһуйбута.
Михаил, эр киһи быһыытынан, устудьуоннуу сылдьан дьиэтигэр тахсан саһаанын бэйэтэ кэрдэрэ, дьиэтин-уотун тутан олорбута. Тыа оҕото буолан үлэни-хамнаһы билбит киһи. Ийэтэ Сивцева Альбина Михайловна биэс оҕотун барытын соҕотоҕун атаҕар туруорбут ийэ буолар. Биһиги, оскуолалар, өрүү холобурга туттар төрөппүппүт. Оҕолорун үөрэттэрээри ханнык да үлэттэн иҥнэн турбатаҕа. Олус үчүгэй асчыт буолан, үлэтин таһынан бэрэски, торт уо.д.а. бурдук астары астаан атыылыыра. Оҕо саадыгар ньээҥкэнэн, оскуолаҕа асчытынан быыкаайык хамнаска үлэлээбитэ. Үс уолун, икки кыыһын кимтэн да итэҕэһэ суох аһатан, таҥыннаран улаатыннартаабыта – оҕолоро бэһиэн үчүгэй үлэһит дьон буола үүннүлэр. Онтон биһиги бөһүөлэк дьоно олус киэн туттабыт, кыһамньылаах ийэҕэ махтанабыт!
Альбина Михайловна бэйэтин оҕолорун үөрэттэрбитин таһынан, атын аймах-билэ дьонун оҕолоро кини дьиэтигэр олорон, Лөгөй орто оскуолатыгар, кэлин төрүттэммит Саха-Бельгийскэй гимназиябытыгар үөрэнэллэригэр сыратын-сылбатын уурбута. Альбина Михайловна бу оҕолору бэйэтин оҕолорун кытта тэҥҥэ тутан көрбүтэ-истибитэ, олох киэҥ аартыгар атаартаабыта.
Үөрэҕи-үлэни өрө туппут, туохтан да чаҕыйбакка иннин диэки дьулуруйан испит, олоххо дьулуурдаах эдэр киһи үөрэҕириини салайар дуоһунаска анаммытын саамай сөптөөҕүнэн ааҕабыт уонна үөрэбит.
Бэйэтин кыаҕынан, тус дьулуурунан үүммүт киһиэхэ бу эппиэтинэс сүктэрилиннэ.
Биһиги Лөгөйбүтүгэр чахчы да өрөгөй күннэрэ үүннүлэр. Ыаллыы олорор оҕото, кыра эрдэҕиттэн табаарыһа Сергей Васильевич Местников Бырабыыталыстыба бэрэссэдээтэлин солбуйааччы дуоһунаһыгар мэктиэлэннэ.
Уолаттар үлэлэрин кыайыахтара, онуоха сөптөөх буһууну-хатыыны аастылар. Биһиги кинилэр билиилэрин, үөрүйэхтэрин туһанан, сыраларын ууран үлэлиэхтэрэ диэн эрэлбит улахан. Үрдүк дуоһунастарга мэктиэлэниилэригэр, Лөгөй нэһилиэгин икки оскуолата — Лөгөй орто оскуолата уонна Саха-Бельгийскэй гимназия үүнэр-сайдар саргылаах сарсыҥҥыны түстээбит туоһуларынан буолар.
Тыа сирин олоҕун укулаатын билэр, омук тылын хайысхалаан үөрэппит оҕолорбут, араас үлэлэргэ сылдьар бары үөрэнээччилэрбит аныгы үйэ олоҕун хамсатар, көҕүлүүр тутаах күүс буолуохтара, Саха сирин сайдыытыгар үлэлэһиэхтэрэ!!!
Эдэрдэр тахсар кэмнэрэ кэллэ. Мэһэйдээмиэххэ!!! Өйүөххэ, сүбэлиэххэ, ситиһиини баҕарыахха!!!
Саргылаана НАФАНАИЛОВА, СӨ үтүөлээх учуутала, Учууталлар учууталлара, Саха-Бельгийскэй гимназияны төрүттээччи, ЮНЕСКО оскуолаларын сэбиэтин бэрэссэдээтэлэ.