Бэлиитикэ Маны аах

Эдэрдэр хампаанньаларга стажировка барыахтара

Бүгүн СӨ бырабыыталыстыбатын мунньаҕар эдэр исписэлиистэр Саха сиригэр үлэлиир улахан хампаанньаларга, өрөспүүбүлүкэ тэрилтэлэригэр стажировкаларын баралларыгар усулуобуйаны тэрийии туһунан кэпсэттилэр. Эдэрдэр дьарыктаах буолууларын туһунан РФ бэрэсидьиэнэ Владимир Путин бу нэдиэлэҕэ иһитиннэрбитэ.

Нэһилиэнньэ дьарыктаах буолуутун сударыыстыбаннай кэмитиэтин салайааччыта Елена Калашникова бэлиэтээбитинэн, туһааннаах докумуон Ил Дархан Анал этиитигэр олоҕуран оҥоһуллубут. Бу үлэ эдэр исписэлиистэр үлэҕэ киириэхтэрин иннинэ улахан хампаанньаларга, тэрилтэлэргэ сылдьан анал үөрүйэҕи, уопуту ылалларыгар туһуланар.

Эдэр исписэлиистэри стажировкаҕа ылыы бүддьүөттэн үбүлэнэр. Онон тэрилтэлэр эдэрдэргэ хамнас уонна кинилэри салайан илдьэ сылдьар исписэлиистэргэ бириэмийэ төлүүр кыахтаналлар.

Санатан эттэххэ, 2016 сылтан 2020 сылга диэри бүддьүөттэн үбүлэнэн барыта 164 эдэр исписэлиис тэрилтэлэргэ тиийэн стажировкатын барбыта. Итинтэн 94 киһитэ ити тэрилтэлэргэ үлэлии киирбитэ. “Олохтоох дьону — бырамыысыланнаска” диэн бырайыагынан хампаанньалар суоттарыгар 738 үлэһит стажировканы ааспыта.

Ыспыраапка быһыытынан эттэххэ, билигин Арассыыйа үрдүнэн үлэтэ суох буолуу көрдөрүүтэ биэс бырыһыаҥҥа тэҥнэһэн турар. Ол эрээри эрэгийиэннэргэ ити сыыппара халбаҥныыр. Ордук билигин, дьаҥ-дьаһах туран, сорох эйгэлэргэ үлэлии сылдьар дьон үлэтэ, дохуота суох хааланнар. Ол иһин Владимир Путин “Биир ньыгыл Арассыыйа” съеһигэр кинилэргэ судаарыстыба өттүттэн тирэх наадатын бэлиэтээбитэ.

– Эрэгийиэннэргэ эдэр дьоннор дьарыктаах буолууларын хааччыйыахха, манна анал бырагырааманы оҥоруохха. Ону таһынан доруобуйаларынан хааччахтаах дьоммутугар эмиэ болҕомто уурар наада. Кинилэр үлэлииллэригэр, дохуот аахсалларыгар усулуобуйата тэрийиэххэ. Манна үөрэтии, анал идэлэргэ дьарыктааһын эмиэ барыахтаах, – диэн иһитиннэрдэ.

Аграфена КУЗЬМИНА

0
0