М.К.Аммосов аатынан Медицина институтун алтыс кууруһугар Иван Попов диэн эдэр учуонай ситиһиилээхтик үөрэнэ сылдьар. Кини илии протеһын салайар нейроинтерфейс диэн тэрили оҥоруунан иккис сылын дьарыктанар.
edersaas.ru
Маннык тэриллэр омук сиригэр 2-3 мөлүйүөҥҥэ тиийэр сыаналаах буоллахтарына, Иван Попов толкуйдаабыт протеһа 200 тыһыынча курдук сыаналаныан сөп.
Иван этэринэн, мэйии–компьютер (ИМК) — неврология ыарыыларын уонна эчэйиилэри эмтииргэ биир саамай кэскиллээхтэрэ уонна эрэллээхтэрэ. Бу технология мэйии уонна илии-атах протезтарын, инбэлиит кириэһилэтин икки ардыгар сибээһи олохтуур аналлаах.
Интерфейсы оҥорор санаа олохтоох чинчийээччи, биофизик уонна робототехник, билигин Өктөмнөөҕү технопааркаҕа үлэлиир Айысхаан Алексеев көмөтүнэн баар буолбут.
«Хамаанда тэринээри өр кэм устата биир санаалаахтары көрдүү сатаабытым. Ол гынан баран, түмүккэ бырайыакпар бэйэм үлэлиир санаа киирбитэ. Дьокуускай куораттааҕы реабилитационнай киин инженердэрин кытары дуогабар түһэрсибиппит, кинилэр протез тас көрүҥэр сүбэ-ама буолуохтара.
Саха сиригэр тарбахтарын үлүппүт дьон ахсаана олус элбэх, онуоха сөптөөх үчүгэй протезтар Арассыыйаҕа суохтар. Онон, бырайыакпытын арыый уларытан, тарбах протезтарыгар көһөрбүт буолуо. Инникитин судаарыстыбаннай эмтиир тэрилтэлэри кытары бииргэ үлэлиэхпитин баҕарабыт. Оччоҕо протез сыанатыгар страховка дьайыа этэ.
Протеһы оҥорорбутугар 50 кыраадыстаах тымныыны, сииги тулуйар матырыйааллары туһаныахпыт», – диэн Иван Попов этэр.
Эдэр учуонай былаанныырынан, саҥа компьютернай тэрил 2018 сыл сааһыгар бэлэм буолан, боруобалааһыны ааһыан наада.
Надежда ЕГОРОВА, «Саха сирэ» хаһыат, edersaas.ru