Саҥа дьыл саҕана, ахсынньы 31 күнүгэр, Айсена, Алексей Поповтар дьиэлэрэ умайан, үс оҕолоох эдэр ыаллар турар бэйэлэрэ эрэ хааллылар.
Ахсынньы 31 күнүгэр Дьокуускай куорат Гастелло уулуссатыгар чааһынай дьиэҕэ баһаар буолбутун туһунан суһал иһитиннэрии киэһэ 18 чаас 13 мүнүүтэҕэ киирбитэ. Баһаарынайдар кэлиилэригэр 52 кв м иэннээх дьиэ номнуо умайан күүдэпчилэнэ турара.
Ыал аҕата Алексей кэпсииринэн, баһаар гаражтан барбыт. Баһаар барар кэмигэр, дьолго, дьиэҕэ ким да суох эбит. Бу туһунан кини маннык кэпсиир:
– Биһиги үс сыллааҕыта кыбартыырабытын атыылаан, чааһынай дьиэ ылан көспүппүт. Дьиҥэр, бэйэбит саҥа дьиэ туттар былааннаах этибит да, дойду үрдүнэн дьаҥ-дьаһах туран, былааммыт ситэ олоххо киирбэтэҕэ. Саҥа дьылы аймахтарбытыгар көрсөр былааннанан онно бары барбыппыт. Мин дьиэбиттэн аҕыйах мал ылаары киэһэлик дьоммутуттан дьиэбитигэр барбытым. Гаражпар массыынабын киллэрээппин кытта эмискэ массыынам умайан тахсыбыта. Суоппар өттүттэн кыайан тахсыбатаҕым, ол иһин биир өттүнэн тахсан тута таһырдьаны былдьаспытым. Туохтан, хайдах уот тахсыбытын өйдөөбөккө да хаалбытым. Ити барыта кыл түгэнэ этэ. Билигин санаатахпына, ити буолуон иннинэ айаннаан иһэн суол саахалыгар түбэспитим, кэннибиттэн иһэр массыына кэлэн түһэн, массыынам кэлин бамперын алдьаппыта. Баҕар онтон бензин бааҕар туох эрэ тахсыбыт буолуон сөп. Уонна киһи уорбалыыра гарааһым иһигэр суохха дылы этэ. Массыынабыттан тахсыбытым кэннэ гарааһым тута умайан киирэн барбыта. Төлөпүөнүм массыынабар хаалбыт буолан, ыалларбар сүүрбүтүм. Кинилэргэ тыллаан баран, төттөрү дьиэбэр киирэн илиибэр туох түбэһиэх харбаан тахсыбытым. Дьиэбит гарааһы кытары сыста турар буолан, уот дьиэҕэ барбыт этэ. Дьиэ иһигэр буруо бөҕө этэ. Иккиһин кыайан киирбэтэҕим, – диэн иһитиннэрэр ыал аҕата Алексей.
Алексей илиитин, сирэйин сиэтэн, билигин балыыһаҕа сытар, улахан эчэйиитэ суох. Айсена оҕолорун кытары аймахтарыгар олорор.
Эдэр ыаллар бэйэ дьыалатынан дьарыктаналлар. Үс оҕолоохтор, кыргыттар бэһис, иккис кылааска үөрэнэллэр, кыра уоллара биэс саастаах. Кэргэнниилэр иккиэн чөл олоҕу тутуһаллар, спордунан утумнаахтык дьарыктаналлар. Дьокуускай куоракка ыытыллар полумарафоннарга көхтөөхтүк кытталлар. “Маннык ыарахан кэмҥэ киһи чугас дьонноох, доҕоттордоох буолара наһаа да күндү эбит. Чугас дьоммут, табаарыстарбыт, доҕотторбут истээт да тута көмөҕө кэлбиттэрэ. Баһаарга докумуоннарбыт барыта умайан хааллылар, онон бастаан докумуоннарбытынан дьарыктаныахпыт. Бу күннэргэ икки өттүттэн төлөпүөннэрбитигэр быыстала суох эрийэллэр. Күндү дьоммутугар көмөҕүт иһин барҕа махталбытын тиэрдэбит”, – диэн этэллэр Айсеналаах Алексей.
Элбэх оҕолоох эдэр ыаллар кыс хаар ортото турар бэйэлэрэ эрэ хааллылар. Күн киһитэ көмүскэс, айыы киһитэ аһыныгас дииллэр. Эдэр ыалларга көмө-тирэх буолуоҕун. Көмө харчыны Айсена нүөмэригэр, Сбербааҥҥа ыытыаххытын сөп.
Сбербаан реквизиттара:
Айсена Александровна Попова (билсэр төлөпүөн: 89644157788)
Счетун нүөмэрэ: 40817810976000657361
Баан: ЯКУТСКОЕ ОТДЕЛЕНИЕ N8603 ПАО СБЕРБАНК
БИК: 049805609
Корр. счет: 30101810400000000609
ИНН: 7707083893
КПП: 143502001
SWIFT-код: SABRRUMM
Аграфена КУЗЬМИНА, edersaas.ru