Саха сиригэр ЗАГС уорганнара тэриллибитэ 100 сылынан, Дьокуускай куоракка Ийэ болуоссатыгар үбүлүөйдээх тэрилтэ уонна «Арассыыйа ийэлэрэ» Бүтүн Арассыыйатааҕы уопсастыбаннай хамсааһын Саха сиринээҕи салаата сэргэх тэрээһини тэрийэн ыыттылар.
Бу туһунан биһиэхэ Сайсары уокуругун управлениетыттан иһитиннэрдилэр. Ол курдук, Дьокуускай төрөөбүт күнүн көрсө олохторун холбоон регистрацияламмыт эдэр ыаллар уонна үбүлүөйдээх дааталаах дьиэ кэргэттэр хатыҥнары олордубуттар. Үөрүүлээх тэрээһиҥҥэ ЗАГС уорганын үлэһиттэрэ, бэтэрээннэрэ, Сайсары уокуругун управатын үлэһиттэрэ кыттыбыттар. Аахсыйа Ийэ пааматынньыгар сибэкки дьөрбөтүн ууруттан саҕаламмыт. Ол кэнниттэн эдэр ыаллар, ЗАГС уонна Сайсары уокуругун управлениетын үлэһиттэрэ көмөлөөн 20 хатыҥы олордубуттар.
Манна сыһыары тутан эттэххэ, маннык хабааннаах тэрээһин төрдүс төгүлүн ыытыллыбыт. Тэрийээччилэр бу иннинэ олордуталаабыт үүнээйилэрэ үүнэн чэлгийэ тураллара хараҕы сымнатарын, көрөргө олус үчүгэйин бэлиэтииллэр. Умнуллубат тэрээһиҥҥэ кыттыбыт ыаллар кэлин кэнчээри ыччаттарыгар: «Манна биһиги дьиэ кэргэн маһа үүнэн турар», — диэн киэн тутта, үөрэ, астына көрдөрүөхтэрэ турдаҕа.
Сайсары уокуругун управатын салалтата уонна кэлэктиибэ тапталлаах куораттарын, олорор сирдэрин-уоттарын тупсарыыга куруук көхтөөхтүк кытталлар итиэннэ уокурукка, куоракка үүнээйини олордууга, тупсарыыга туһуламмыт тэрээһиннэри өйүүргэ бэлэмнэрин биллэрэллэр.