Бүлүүгэ, М.Н.Жирков аатынан Култуура дыбарыаһыгар “2018-2022 сс. хаачыстыбалаах олорор дьиэнэн хааччыйыы уонна олох-дьаһах хомунаалынай өҥө хаачыстыбатын үрдэтии” судаарыстыбаннай бырагыраама чэрчитинэн эдэр ыалларга сертификаттары туттарыы тэрээһинэ буолан ааста.
edersaas.ru
Улуус баһылыга Сергей Винокуров, Үлэ уонна социальнай сайдыы министиэристибэтин Бүлүүтээҕи уорганын салайааччытын солбуйааччы Александр Комаров, улуус баһылыгын социальнай боппуруостарга солбуйааччы э.т. Клара Гаврильева бу үөрүүлээх тэрээһиҥҥэ кэлбит эдэр ыаллары эҕэрдэлээн туран, кинилэри кытта аһаҕас кэпсэтиини тэрийдилэр, элбэх ыйытыыларга хоруйдаатылар.
Быйыл улуус үрдүнэн 24 (Бүлүү куоратыттан уон ыал уонна Дьөккөн, Өкүндү, Чернышевскай, Тааһаҕар, Тоҕус, Халбаакы, Баппаҕаайы, II Чочу, II Күүлэт, Бөкчөҥөө нэһилиэктэриттэн, Кыһыл Сыыртан) эдэр ыал дьиэ туттарга социальнай төлөбүрдэри ылар кыахтаннылар. Улуус баһылыга Сергей Винокуров ону туоһулуур сертификаттары үөрүүлээх быһыыга-майгыга туттарда.
Сертификаттары ылбыт эдэр ыаллар ааттарыттан Любомир Сыромятников өрөспүүбүлүкэ уонна улуус салалтатыгар улахан махталын биллэрдэ. Судаарыстыба эдэр ыаллары өйүүр араас бырагыраамалара олоххо киирэн, эдэрдэр дьиэ-уот тутталларыгар дьоһуннаах көмө буолар.
Бүлүүттэн Николай Федоров, «Саха сирэ» хаһыат, edersaas.ru саайтка анаан