СӨ Ил Дарханын гранынан Уус Алдан улууһун 25 эдэр педагога Санкт-Петербург, Казань куораттарынан баран үөрэнэн, үлэҕэ үөрүйэхтэрин үрдэтинэн кэллилэр.
Уус Алдан улууһун эдэр учууталларын ассоциацията “Педагогическай сайдыы аадырыстарынан” диэн бырайыагынан СӨ Ил Дарханын гранын кыайбыта. Көрүллүбүт гранынан улуус 25 эдэр педагога Санкт-Петербург, Казань куораттарга баран үөрэнэн, үлэҕэ үөрүйэхтэрин үрдэтинэн, билиилэрин-көрүүлэрин хаҥатан кэлбиттэрэ. Улуус эдэр педагогтарын ассоциациятын бэрэссэдээтэлэ, Мүрү 1-кы нүөмэрдээх оскуолатын англия тылын учуутала Анна Артамонова:
— Билиҥҥи кэмҥэ саамай тоҕоостоох, суолталаах тиэмэҕэ – функциональнай кырааматынаһы олохсутуу диэҥҥэ үөрэнэн кэллибит. Бырайыак куонкурустаах буолан, бастакы түһүмэххэ эдэр педагогтар бары тест ааспыттара. Иккис түһүмэххэ Уус Алдан улууһун үөрэҕин сайыннарыытын үрдэтиигэ бырайыактарын көмүскээбиттэрэ. Уопсайа, 48 эдэр учуутал кыттыбытыттан, финалга тахсыбыт 25 учууталы үлэ уопутун эбинэр үөрэххэ (стажировка) илдьибиппит. Педагогическай үөрэх кэннинээҕи Санкт-Петербург академиятыгар үөрэннибит, элбэх түмэллэринэн сырыттыбыт. Казань куоракка түмэллэринэн, тыйаатырдарынан сырыттыбыт. Элбэҕи туһанныбыт, биллибит-көрдүбүт.
Идиэйэбит олоххо киирэригэр уонна эдэр учуутал үүнэригэр-сайдарыгар Грант баара улахан көмөлөөх. Бу грант суотугар Дьокуускай-Санкт-Петербург-Казань-Дьокуускай баран кэллибит. Билигин ким даҕаны босхо баран үөрэнэн кэл диэбэтэ чахчы. Судаарыстыбаттан, өрөспүүбүлүкэттэн өйөбүллээх буолан баран кэллибит. Инникитин даҕаны салгыы граннаах куонкурустар баар буолалларыгар баҕарабыт. Бэйэбит атын даҕаны идиэйэлэрбитин олоххо киллэриэхпит диэн эрэнэбит, — диэн санаатын үллэстэр.
Кылгастык кэпсээн аастахха, Уус Алдан улууһун эдэр учууталларын ассоциацията 2016 сылтан тэриллэн, Юстиция министиэристибэтигэр бэлиэтэниини ааһан, сыллата араас тэрээһиннэри ыытар. Күн бүгүн улууска 200-чэкэ эдэр учуутал үлэлиир. Ассоциация кинилэр интэриэстэрин, идэлэрин баһылыылларыгар сайдар кыахтарын, айар дьоҕурдарын, билиилэрин-көрүүлэрин хаҥатар, уопут атастаһар былаһааккаларынан буолар. Атын улуустар эдэр учууталларын ассоциацияларын кытта ыкса ситимнээхтик үлэлииллэр.
Түгэнинэн туһанан Анна Николаевна улуус эдэр педагогтарын ааттарыттан СӨ Ил Дарханыгар Айсен Сергеевич Николаевка махталын биллэрэр.
Людмила ПОПОВА, “Саха сирэ” хаһыат, edersaas.ru