Ааспыт сылга өрөспүүбүлүкэҕэ «Эдэр табаһыт» бырагыраама ылыллыбыта.
Бу олус суолталаах докумуон аан бастаан «Саха сиринээҕи Арктика зонатын социальнай-экэнэмиичэскэй уонна Саха сиригэр олорор аҕыйах ахсааннаах хотугу норуоттары 2020-2024 сс. сайыннарыы туһунан» бырагыраама чэрчитинэн олоххо киирбитэ. Олорор дьиэни тупсарыыга биир кэмнээх
социальнай төлөбүр Арктика зонатын 13 улууһугар түөрт сылтан итэҕэһэ суох олорор таба хаһаайыстыбатыгар үлэлиир 35 сааһыгар диэри олорор эдэр табаһыттарга көрүллэр. Судаарыстыба өйөбүлүнэн туһаммыт табаһыт бу салааҕа өссө биэс сылтан итэҕэһэ суох үлэлиэхтээх.
Арктическай оройуоннартан бырагыраамаҕа хапсар иһин Анаабыр, Булуҥ, Үөһээ Халыма, Эдьигээн, Муома, Аллараа Халыма, Усуйаана уонна Эбээн Бытантай улуустарыттан 11 эдэр табаһыт кыттыыны ылла.
Усуйаана Туматыттан Алия Болтунова чааһынай дьиэни атыылаһарга былаанныыр. Кини Ил Дархаҥҥа, СӨ Бырабыыталыстыбатыгар, Арктика уонна Тыа хаһаайыстыбатын министиэристибэлэригэр өйөбүллэрин иһин барҕа махталын тиэртэ. «Үрдүкү салалтабыт биһиги курдук эдэр ыал бэйэбит баҕабытынан туттан олорор дьиэлэнэрбитигэр өйөбүллэриттэн муҥура суох дьоллонон сылдьабыт«, — диэн санаатын үллэстэр Алия Болтунова. Анаабыр Үрүҥ Хайатыттан сылдьар Семён Туприн эмиэ судаарыстыба өйөбүлүн туһанан бэйэтин дьиэ кэргэнин усулуобуйатын тупсарар санаалаах. «Табаны иитии — биһиги, хоту дойду дьонун, төрүт дьарыкпыт. Судаарыстыба өйөбүлүн туһанан салгыы сайдыахпыт уонна таба иитиитин күүскэ сайыннарыахпыт. Өрөспүүбүлүкэбит салалтатыгар эдэр табаһыттары өйүүллэрин иһин истиҥ махталбытын тиэрдэбит!», — диэн этэр.
Ити курдук, олорор дьиэлэрин усулуобуйатын тупсарыыга өйөбүллэрин иһин үбүлээһиҥҥэ тиксибит эдэр табаһыттар эмиэ махтаннылар. Маны таһынан, СӨ Ил Дарханын көҕүлээһининэн РФ Арктическай зонатыгар хапсыбат өрөспүүбүлүкэ атын хотугу улуустарын эдэр табаһыттарыгар социальнай төлөбүрү оҥорор балаһыанньа оҥоһулла сылдьар. Бу туһунан СӨ Бырабыыталыстыбатын пресс-сулууспата иһитиннэрдэ.
Елена ПОТОЦКАЯ Саха сирэ хаһыат, edersaas.ru