Кулун тутар 28-30 күннэригэр Дьокуускайга эдэр суруйааччылар өрөспүүбүлүкэтээҕи XXIII сүбэ мунньахтара ыытыллыаҕа. Үлэлэри олунньу 14 күнүттэн тутуохтара.
Сүбэ мунньахха 18-тан 40 саастарыгар диэри айар үлэнэн дьарыктанар дьон кыттыахтара. Быйылгы сүбэ мунньахха поэзияны, прозаны, нуучча уонна аҕыйах ахсааннаах хотугу норуоттар литератураларын таһынан драма, кириитикэ, оҕо литературатын секциялара үлэлиэхтэрэ.
Кыттыан баҕалаахтар олунньу 14 күнүттэн кулун тутар 6 күнүгэр диэри ederlit@mail.ru аадырыска үлэлэргитин ыытыаххытын сөп. Поэзияҕа – 5-10 хоһоон, прозаҕа – 1-3 тэттик кэпсээн эбэтэр биир улахан айымньы, драмаҕа биир айымньы, оҕо литературатыгар 5-10 хоһоон, 1-3 кэпсээн эбэтэр биир улахан айымньы, кириитикэҕэ 1-3 ыстатыйа ирдэниллэр. Үлэлэр бары ыйыллыбыт электроннай аадырыска биир докумуонунан ыытыллаллар, сахалыы тиэкистэр хайаатар да сахалыы буукубаларынан таҥыллыбыт буолуохтаахтар. Драма, кириитикэ, аҕыйах ахсааннаах хотугу норуоттар литератураларын секцияларыгар сааһыттан тутулуга суох ким баҕарар кыттыан сөп.
Кэтэхтэн куонкурус түмүгэ кулун тутар 10 күнүгэр тахсыаҕа. Сүбэ мунньахха кыттар быраабы ылбыт литератордарга кулун тутар 13 күнүгэр диэри тэрийээччилэр ыҥырыы сурук ыытыахтара. Онон кыттааччылар ааккытын-суолгутун, аадырыскытын, электроннай почтаҕыт аадырыһын, төлөпүөҥҥүт нүөмэрин, ханна үлэлииргитин, үөрэнэргитин, бэйэҕит тускутунан кылгас билиһиннэрии суруйан ыытаргытын умнумаҥ.
Ыспыраапка: Эдэр суруйааччылар сүбэ мунньахтара 2004 сылтан сөргүтүллэн ыытыллар. Тэрийээччилэринэн Саха сирин суруйааччыларын сойууһа, СӨ култууратын уонна духуобунай сайдыытын министиэристибэтэ, СӨ ыччат дьыалаларыгар уонна социальнай коммуникациятыгар министиэристибэтэ, Саха сирин суруйааччыларын ассоциацията буолаллар. Эдэрдэр суруйууларын норуодунай суруйааччылар, Саха сирин биллэр-көстөр поэттара, суруйааччылара ырытыахтара, маастар-кылаастары ыытыахтара.
Аграфена КУЗЬМИНА,
Мария ВАСИЛЬЕВА (СИА) хаартыскаҕа түһэриитэ.