Кулун тутар 29 күнүгэр Дьокуускайга Эдэр суруйааччылар XXIII сүбэ-мунньахтара саҕаланна. Икки сыллааҕыта сүбэ-мунньах онлайн көрүҥүнэн ыытыллыбыт буоллаҕына, быйыл элбэх киһи кыттар. Өрөспүүбүлүкэ 19 улууһуттан (ол иһигэр хотугу улуустартан) барыта 80-тан тахса сайаапка киирбититтэн, 57 киһи үлэтин талан ылбыттара. Бүгүн 49 кыттааччы кэлэн, үөрүүлээх арыллыытыгар уонна пленарнай мунньахха кытынна.
Бастаан Арассыыйа Суруйааччыларын сойууһугар саҥа киирбит дьоҥҥо билиэттэрин туттардылар. Ол курдук, Эдуард Ефремов-Дэхси, Михаил Кривошапкин-Киргэмбис, Надежда Ильина, Ольга Янцен, Михаил Сиванков, Бүөтүр Хара, Харыйалаах Уола, Алексей Коваленко киирдилэр.
Култуура, духуобунай сайдыы миниистирин солбуйааччы Марина Силина кыттааччылары эҕэрдэлээтэ. Кини өрөспүүбүлүкэҕэ 5 тылынан саҥарар литература баарын бэлиэтээн туран, кыайыылаахтарга айар командировкаҕа барар сэртипикээти аныылларын туһунан эттэ. Ил Дархан Айсен Николаев, СӨ бырабыыталыстыбатын бэрэссэдээтэлин солбуйааччы Ольга Балабкина эҕэрдэ тылларын ааҕан иһитиннэрдэ.
Арассыыйа Суруйааччыларын сойууһун бырабылыанньатын сэкиритээрэ, норуодунай суруйааччы Николай Лугинов, СӨ Суруйааччыларын сойууһун бэрэссэдээтэлэ Иван Мигалкин, норуодунай суруйааччылар Сэмэн Тумат, Павел Харитонов-Ойуку, Арассыыйа Суруйааччыларын сойууһун Эдэр литератордар сэбиэттэрин чилиэнэ Григорий Шувалов, уо.д.а. тыл эттилэр.
Саха сирин суруйааччыларын сойууһун бырабылыанньатын бэрэссэдээтэлэ Наталья Харлампьева аныгы литература туругун, сыалын-соругун туһунан дакылаат аахта.
Сүбэ-мунньах кыттааччылара бүгүн-сарсын бөлөхтөрүнэн арахсан, үлэлиэхтэрэ. Кинилэр айымньыларын суруйааччылар ырытыахтара, сүбэ-ама биэриэхтэрэ. Бары бөлөхтөртөн талыллыбыт кыайыылаахтар бастакы кинигэлэрэ тахсарыгар сэртипикээти тутуохтара. Бастыҥнар айымньылара литературнай сурунаалларга, хомуурунньуктарга бэчээттэниэхтэрэ. Быйыл поэзия, проза, нууччалыы уонна аҕыйах ахсааннаах норуоттар литератураларын сэргэ, драма, оҕо литературатын уонн кириитикэ секциялара үлэлииллэр.
Кэнники сүбэ-мунньах чэрчитинэн талыллыбыт эдэр ааптардар айымньыларынан “21-с үйэ 21 эдэр суруйааччыта” кинигэни сүрэхтээһин, Григорий Шуваловы кытары көрсүһүү, Доҕордоһуу киэһэтэ буолуохтара.
Эдэр суруйааччылар сүбэ-мунньахтарын Саха сирин Суруйааччыларын сойууһа, култуура, духуобунай сайдыы министиэристибэтэ, “Саха сирин суруйааччылара” ассоциация тэрийдилэр.
Ангелина Васильева, “Саха сирэ” хаһыат, edersaas.ru
Хаартыска: СИА.