Эдэр суруйааччылар өрөспүүбүлүкэтээҕи XXIII сүбэ мунньахтара саҕаланна
Кулун тутар 28-31 күннэригэр Дьокуускайга Эдэр суруйааччылар өрөспүүбүлүкэтээҕи XXIII сүбэ мунньахтара ыытыллыаҕа. Быйылгы сүбэ мунньах ЯАССР 100 сыллаах үбүлүөйүгэр ананыаҕа.
Сүбэ мунньаҕы Саха сирин суруйааччыларын сойууһа Култуура уонна духуобунай сайдыы, Ыччат дьыалаларыгар уонна социальнай коммуникацияҕа министиэристибэлэрин, Саха сирин суруйааччыларын ассоциациятын кытары тэрийэн ыытар. Сүбэ мунньах кыттыылаахтарын талыы икки түһүмэҕинэн барбыта. Иккис түһүмэххэ барыта 60 кыттааччы киирдэ.
Бүгүн киэһэ 16 чаастан сүбэ мунньах кыттыылаахтара драмаҕа уонна киинэ сценарийын суруйууга маастар-кылааска сылдьыахтара. Иккис күн, кулун тутар 29 күнүгэр, сарсыарда 10 чаастан СӨ наукатын академиятын концеренц-саалатыгар тэрээһин үөрүүлээх аһыллыыта буолуоҕа. Манна Арассыыйа суруйааччыларын сойууһугар быйыл саҥа киирбит суруйааччылар билиэт ылыахтара. Эбиэт кэннэ кыттааччылар секцияларынан арахсан үлэлиэхтэрэ.
Быйыл сүбэ мунньах сэттэ хайысханан үлэлиэҕэ. Ол курдук, поэзияҕа, прозаҕа, драмаҕа, кириитикэҕэ, оҕо литературатыгар, аҕыйах ахсааннаах хотугу норуоттар литератураларыгар, нуучча литературатыгар туспа секциялар үлэлиэхтэрэ.
Эдэр ааптардар үлэлэрин норуодунай суруйааччылар, поэттар Наталья Харлампьева, Николай Лугинов, Сэмэн Тумат, Павел Харитонов-Ойуку, прозаиктар П.А.Ойуунускай аатынан судаарыстыбаннай бириэмийэ лауреата Елена Слепцова-Куорсуннаах, Данил Макеев, Анатолий Слепцов, Ольга Пашкевич, Айысхаана, Степан Сивцев, Евдокия Иринцеева-Огдо, поэттар Гаврил Андросов, Рустам Каженкин, Саргылаана Гольдерова, Елена Овчарова, Константин Сосин, Варвара Белолюбская-Архук, о.д.а. ырытыахтара.
Бу күн киэһэ 17 чаастан өрөспүүбүлүкэтээҕи медиа-кииҥҥэ Арассыыйа суруйааччыларын сойууһун иһинэн үлэлиир Эдэр суруйааччылар сэбиэттэрин отделын салайааччыта, Ю.П.Кузнецов аатынан литературнай бириэмийэ лауреата, поэт, кириитик, Москваттан кэлбит ыалдьыт Григорий Шуваловтыын көрсүһүү буолуоҕа. Көрсүһүү быһа эпииринэн “Сахамедиа” Ютуб ханаалыгар көстүөҕэ.
Киэһэ 18 чаастан Национальнай библиотека историческай саалатыгар “21 үйэ сүүрбэ биир эдэр суруйааччыта” диэн эдэр ааптардар хомуурунньуктарын сүрэхтэниитэ буолуоҕа. Хомуурунньугу “Чолбон” сурунаал кылаабынай эрэдээктэрэ, Саха сирин суруйааччыларын сойууһун бэрэссэдээтэлин солбуйааччы Гаврил Андросов хомуйан оҥорбута. Кинигэҕэ поэзияҕа, прозаҕа, драмаҕа, оҕо литературатыгар уонна уус-уран кириитикэҕэ билигин үлэлэһэ сылдьар сүүрбэ биир ааптар айымньылара киирдилэр.
Сүбэ мунньах үһүс күнүгэр, кулун тутар 30 күнүгэр, кыттааччылар эбиэккэ диэри секцияларынан үлэлиэхтэрэ. Эбиэт кэннэ сүбэ мунньах уопсай түмүгүн таһаарыы буолуоҕа. Түмүккэ эдэр ааптардар сүбэ мунньахха кыттыбыттарын туоһулуур сертификат ылыахтара. Ону таһынан секциялар үлэлэригэр бэлиэтэммит эдэр суруйааччылар үлэлэрин “Чолбон”, “Полярная звезда” литература сурунаалларга бэчээттэтэр кыахтаныахтара. Сүбэ мунньах түмүгүнэн бастыҥ суруйуулаах ааптар туспа кинигэнэн бэчээттэтэн тахсарга сертификаты тутуоҕа.
Аграфена КУЗЬМИНА