Ыччат, дьиэ кэргэн бэлиитикэтин миниистирэ Афанасий Владимиров, Саха сирин Суруйааччыларын ассоциациятын салайааччы Олег Сидоров, Саха сирин Суруйааччыларын сойууһун бэрэссэдээтэлэ Наталья Харлампьева, драматург Василий Харысхал, тылбаасчыт Аита Шапошникова эдэр ааптардары кытта көрүстүлэр.
Ангелина Васильева, “Саха сирэ” хаһыат, edersaas.ru
Көрсүһүүгэ, сүрүннээн, туох үлэ ыытыллыбытын ырытыһыы, Ыччат сылыгар саҥа тэрээһиннэри торумнаһыы буолла. “Тыл кыһата”, “Сэргэлээх уоттара” суруйар-айар ыччат түмсүүлэрэ кыттыыны ыллылар.
Эдэрдэри кытта үлэ тохтуу сылдьан баран, 2004 с. сөргүтүллүбүтэ. Бу сыл эдэр суруйааччылар XIV сүбэ мунньахтара буолбута. Ол кэмтэн иккилии сыл буола-буола барыта 7 сүбэ-мунньах ыытылынна. Уонтан тахса сыл иһигэр хайы-үйэ бэйэлэрин суолларын булбут эдэр суруйааччылар иитиллэн таҕыстылар. Кинилэр суруйааччылар айар сойуустарын чилиэннэрэ буоллулар, тэрийэр үлэҕэ көхтөөхтүк кытталлар, иккис-үһүс кинигэлэрин таһаардылар.
Миниистир Афанасий Владимиров “биһиги бииргэ үлэлэһэргэ бэлэммит” диэн эттэ. Кини Ыччат сылыгар эдэр дьон көхтөөх буоларын күүтэрин тоһоҕолоон бэлиэтээтэ.
—Билигин киинэ, тыйаатыр сайдан, саҥа таһымҥа тахсар, онон сценарий, драма жанрыгар ылсан үлэлээҥ. “Синергия Севера” диэн улахан тэрээһиҥҥэ бырайыак оҥорон киллэрэн, кыттыаххытын сөп. Улуустарга ыччат күннэригэр, десаннарга кыттыһан, ааҕааччыларгытыныын алтыһыҥ. Өрүү инники күөҥҥэ сылдьыҥ, эһиги айымньыларгытын дьон кэтэһэр, — диэн кини эттэ.
Санатар буоллахха, Литература сылыгар эдэрдэр 5 кинигэлэрэ министиэристибэ көмөтүнэн бэчээттэнэн тахсыбыта. Быйыл Ыччат министиэристибэтэ “Чолбон” сурунаал эрэдээксийэтиниин кыттыһан эдэр суруйааччыларга куонкурус биллэрдэ.
Олег Сидоров “интэриэһинэй бырайыактары өйүөхпүт” диэн эрэннэрдэ. Ону тэҥэ, ассоциация иһинэн Литература оскуолата аһыллан үлэлиэҕэ. Онно, холобур, драматургия өттүгэр Василий Харысхал, тылбааска Аита Шапошникова эдэрдэри үөрэтиэхтэрэ. Бу курдук, прозаҕа, поэзияҕа эмиэ семинардар ыйга биирдэ ыытыллыахтара.
Быйыл сайын, үгэскэ кубулуйбут, эдэр ааптардары үөрэтэр-уһуйар семинар Суоттуга ыытыллыахтаах.
Наталья Харлампьева уонна Харысхал эдэрдэргэ суруйааччы уустук аналын, үрдүк эппиэтинэһин, туох санаанан сирдэтиниэхтээҕин, сайдар-үүнэр суоллары, о.д.а. сырдаттылар.
Салгыы эдэр дьон туран, бэйэлэрин санааларын, идиэйэлэрин эттилэр. “Тыл кыһата” түмсүү салайааччыта Гаврил Андросов, бэйиэт Рустам Каженкин эдэр суруйааччылар сүбэ мунньахтарыгар кэлэр-барар ороскуоту уйунары, бастыҥнары Каадыр резервэтигэр киллэрэри туруорустулар. Ааҕааччыны оҕо эрдэҕиттэн иитиллиэхтээҕин, литературнай лааҕырдары тэрийэр наадатын, тылбааска улахан болҕомто ууруллуохтааҕын туһунан, о.д.а. санаалар этилиннилэр.
Бэйиэт Дорҕоон Дохсун Борогууһун андеграунд-бэстибээли тэрийэн эрэллэрин туһунан кэпсээтэ. Манна мусукааннар, бэйиэттэр, худуоһунньуктар түмсүөхтэрэ.
Бу курдук санаа атастаһан, икки өттүттэн биир санааҕа кэлэн, инники үлэни торумнаан, туһалаах кэпсэтии таҕыста.
Ангелина Васильева, “Саха сирэ” хаһыат, edersaas.ru
Рустам Каженкин түһэриилэрэ.