Саха сирин айар-суруйар ыччатын үгэскэ кубулуйбут Эдэр суруйааччылар XXII өрөспүүбүлүкэтээҕи сүбэ мунньахтарыгар ыҥырабыт. Уус-уран литератураҕа дьоҕурдаах ыччаты көрдүүргэ, түмэргэ уонна сайыннарарга анаммыт тэрээһин Дьокуускай куоракка 2020 сыл муус устар 1-2 күннэригэр ыытыллыаҕа. Сүбэ мунньахха 18-тан 40 диэри саастаах Саха Өрөспүүбүлүкэтин бары олохтоохторо кыттар кыахтаах.
Саха сирин биллиилээх суруйааччылара, кириитиктэрэ салайар сахалыы тыллаах Поэзия, Проза, Дыраама, Кириитикэ, Оҕо литературатын, Нууччалыы тыллаах литература, Хотугу төрүт олохтоох аҕыйах ахсааннаах норуоттар литератураларын секциялара үлэлиэхтэрэ. Сүбэ мунньах кыттыы ирдэбилэ:
— ПОЭЗИЯ – 5-10 талыллыбыт хоһоон;
— ПРОЗА – 1-3 талыллыбыт кэпсээн (эбэтэр биир улахан кээмэйдээх айымньы);
— ДЫРААМА* – 1 актаах айымньы;
— НУУЧЧАЛЫЫ ТЫЛЛААХ ЛИТЕРАТУРА* – 5-10 хоһоон эбэтэр 1-3 диэри кэпсээн;
— ХОТУГУ ТӨРҮТ ОЛОХТООХ АҔЫЙАХ АХСААННААХ НОРУОТТАР ЛИТЕРАТУРАЛАРА* – 5-10 хоһоон эбэтэр 1-3 диэри кэпсээн;
— ОҔО ЛИТЕРАТУРАТА* – 5-10 хоһоон эбэтэр 1-3 диэри кэпсээн, остуоруйа;
— КИРИИТИКЭ* – 1-3 критическэй ыстатыйа, рецензия.
Ону тэҥэ кыттааччы портфолиотын (Манна киирэр: кыттааччы толору аата, сааһа, ханна олороро, киминэн үлэлиирэ, билсэр төлөпүөн, кылгас биографията) ыытара булгуччулаах.
БОЛҔОЙУҤ! ПОЭЗИЯ уонна ПРОЗА хайысхаларыгар кыттыы икки түһүмэхтээх. Маҥнайгы түһүмэх кэтэхтэн ыытыллар. Манна кыттааччылар айымньыларгытын олунньу 13 күнүттэн кулун тутар 1 күнүгэр диэри ыытаҕыт. Сүүмэрдээһини ааспыттарга иккис түһүмэххэ тахсыбыттарын туоһулуур ыҥырыы кулун тутар 9-13 күннэригэр ыытыллар.
БОЛҔОЙУҤ! ДЫРААМА, КИРИИТИКЭ, ХОТУГУ ТӨРҮТ ОЛОХТООХ АҔЫЙАХ АХСААННААХ НОРУОТТАР ЛИТЕРАТУРАЛАРА секцияларга кыттааччы сааһа хааччахтаммат.
Саха ыччата, хараххыт уоттаммыт, сүрэххит тэппит буоллаҕына, айымньыларгытын уонна эбии ыйытыыларгытын ederlit@mail.ru электроннай аадырыска күүтэбит! Сүбэ мунньахха сыһыаннаах боппуруостардаах буоллаххытынан үлэ кэмигэр +7(4112)32-50-72 нүөмэргэ эрийэн ыйыталаһыаххытын сөп.
Эдэр суруйааччылар XXII өрөспүүбүлүкэтээҕи сүбэ мунньахтара муус устар 1-2 күннэригэр буолуоҕа. Онно сүүмэрдэммит айар ыччат Тэрийэр бөлөх аатыттан ыҥырыы сурук тутуоҕа. Хас биирдии кыттыылаахха туоһу сурук көрүллэр. Кыттааччы Дьокуускайга диэри кэлэр-барар айанын, мунньах кэмигэр түһэр сирин бэйэтэ булунар.
Эдэр суруйааччылар XXII өрөспүүбүлүкэтээҕи сүбэ мунньахтара Саха сирин Суруйааччыларын сойууһун көҕүлээһининэн, СӨ Култуураҕа уонна духуобунай сайдыыга министиэристибэтин, СӨ Ыччат дьыалаларыгар уонна социальнай коммуникацияларга министиэристибэтин, «Саха сирин суруйааччыта» ассоциация өйөбүллэринэн ыытыллар.
ТЭРИЙЭР БӨЛӨХ