Сыл бүтүүтэ «Эдэр саас» сыһыарыы айар бөлөҕө сыл бастыҥнарын, саҥа ааттарын таһаарда. Манна араас эйгэлээх ыччат баар. Кинилэр бары дьэҥкэ сыаллаах, аҕыраабат дьулуурдаах, булгуруйбат санаалаах, сырдык ыралаах, үлэни таптыыр эдэр дьон.
Сыл бастыҥ спортсмена – Лев Павлов
“Эдэр саас” бастакы нүөмэриттэн: “Ол курдук, муус устар 15 күнүгэр Лев Павлов 21 саастарыгар диэри уолаттарга көҥүл тустууга Арассыыйаҕа бастыыр иһин күрэхтэһиигэ кыһыл көмүс мэтээли ылары ситистэ! Дойдубут 43 эрэгийиэниттэн 300-тэн тахса тустуук кииристэ”.
“Эдэр саас” бастыҥ ыалдьыта – Масаха Мэхээс
Ыччат олох араас ирдэбилигэр киирэн, куустарыллан, сарсыҥҥытын, инникитин тосхолломмокко олороро күннээҕи көстүү буолан эрэр. Ол эрээри, ыччаты ыччат угуйар дииллэринии, социальнай ситимнэргэ Масаха Мэхээс саха омугун устуоруйата, култуурата хайысхалаах блогу ыытан, үгүс дьон биһирэбилин ылар.
Бастыҥ эдэр учуутал – Кэскилээнэ Лукина
«Саха сирэ” хаһыаттан быһа тардыы: “Төрөөбүт тыл уонна литэрэтиирэ бастыҥ учуутала” Бүтүн Арассыыйатааҕы куонкурус өрөспүүбүлүкэтээҕи түһүмэҕин быйылгы кыайыылааҕынан Горнай улууһун Бэрдьигэстээх орто оскуолатын саха тылын уонна литэрэтиирэтин учуутала, Баишевтар педагогическай династияны салҕааччы Кэскилээнэ Лукина таҕыста”.
Бастыҥ эдэр артыыс – Эдуард Захаров
Кини Сергей Потапов “Ойуур” испэктээгэр Алексей Буланов оруолун толорор. Бу испэктээк саҥа арыйыыта буолбутун көрөөччүлэр бэркэ биһирээн таһыналлара бигэргэтэр. Ону таһынан, «Коркин. Андаҕар» испэктээккэ Сахааччаны арылхайдык, чаҕылхайдык оонньуур.
Бастыҥ эдэр ааптар – Сайыына Черкашина
Хотугу норуоттар тылларын уонна култуураларын институтун 3 кууруһун устудьуона, “Сэргэлээх уоттара” куруһуок чилиэнэ буолар. Edersaas.ru саайтка «Дьэдьэн” диэн кэпсээнэ бэчээттэммитэ. Институт иһинэн Былатыан Ойуунускайга анаммыт кэпсээн күрэҕэр — бастакы, Бүөтүр Тобуруокапка анаммыт өйтөн суруйууга хоһоонун салҕаан үһүс миэстэлэри ылбыта. Суруйааччы Борис Павлов “Кэм” сурунаалыгар үлэлэһэр.
Бастыҥ устудьуоннар этэрээттэрин хамандыыра – Терентий Третьяков
Кини геологоразведочнай факультет устудьуона буолар. Алтынньыга «Саха сирин устудьуоннар этэрээттэрин бастыҥ хамандыыра» анал аатынан наҕараадаламмыта.
Бастыҥ устудьуоннар этэрээттэрин хамыһаара – Анисия Титова
Быйыл ХИФУ устудьуоннар этэрээттэрин хамыһаара Арассыыйатааҕы устудьуоннар этэрээттэрин үрдүк наҕараадатын туппута.
Сыл бастыҥ устудьуоннара – Максим Голомарев, Валентина Михайлова
Хотугулуу-Илиҥҥи федеральнай университет устудьуона Валентина Михайлова «МОЛОДЫЕ ЛИЦА СТРАНЫ 2023» XVII Арассыыйатааҕы куонкурус түмүгүнэн вице-мисс буолла.
РФ Хотугулуу-Илиҥҥи норуоттар тылларын уонна култууратын институтун устудьуона Максим Голомарев «Талаан» номинацияҕа «Уһук Илин уолана» («Мистер Дальний Восток») аакка тигистэ.