Күнү быһа илиибитин араарбакка сиэп төлөпүөнүнэн бассааптаһабыт, сонуну билэбит, дьыаланы-куолуну быһаарсабыт, доҕотторбутун кытта кэпсэтэбит. Ол эрээри интернеккэ төрөөбүт тылбытынан уу сахалыы кэпсэтэр, ааҕар, ырытыһар хонуу суох. Ону боруостаан, сэтинньи 25 күнүгэр, edersaas.ru диэн сибиэһэй, сонун суруйуулардаах сахалыы тыллаах сайты уонна мобильнай сыһыарыыны таһаардыбыт. Сайт ааҕааччыларга барыларыгар, эдэриттэн эмэнигэр диэри ананар.
Сайт тутула
Информация киэҥ куйаарыттан ордук кэрэхсэбиллээҕи, наадалааҕы талан ыллыбыт. Бэлиитикэ, экэниэмикэ, култуура, саха киинэтэ, тыа сирэ, суол-айан, быһылаан, сокуону кэһии барыта манна баар. Чулуу дьоммут, чаҕылхай ыччаппыт, эстрадабыт сулустара, спортсменнар, тыа сирин талааннаах дьоно-сэргэтэ тугу кэпсиирий? «Итии чэй» рубрикаҕа Игорь Егоров, Ирина Елизарова, Голливуду “куоһарар” баҕалаах “Детсат” резиденнэрин, эдэр тойоттор уо.д.а. билиҥҥи кэм трендэ буолбут ыччат интервьюларын ааҕыҥ.
“ЭС”- ностальжи!
Ким эдэр сааһыгар эргиллэн, ностальгиялыан баҕарбат буолуой..? 80-с, 90-с сылларга эргитээри, “ЭС-ностальжи” рубрикаҕа матырыйааллары мустубут. Бассаапка тарҕаммыт сурах кырдьык дуу, сымыйа дуу? Бу туһунан үгүстүк толкуйдуубут, интернет киэҥ куйаарыгар киһи мунаахсыйара элбэх буолбаат! Сурах дьиҥнээҕин, сымыйатын “ҮҺҮ” рубрикаттан билиэххин сөп.
Сүбэлиибит
Оҕобун ханнык үөрэххэ ыытабын? Тыһы хайдах имитэбит? Гектарбын туохха туһанабын? Дьиэбин хайдах туттабын? Даачабын хайдах киэргэтэбин? Судаарыстыбаннай өҥөнү, субсидияны хайдах туһанабын? Манна аналлаах сүбэлэри мустубут. «Сүбэһит” рубриканы арый. Мунаарар боппуруостары илдьиритэн, быһааран биэрдибит. “Эйиэхэ туһанааччыга» — потребитель муннуга. Дьиэ -уот тутуутугар, атыылаһыытыгар, ипотекаҕа мунаарар ыйытыылардааххыт? “Алаһа” рубрикаҕа киириҥ. “Сатабыл” – саха мындыр толкуйун көрдөрөр туспа рубрикалаахпыт.
edersaas.ru сыһыарыылардаах
“Саха сирэ” хаһыат сыһыарыылара edersaas.ru сайтка киирдилэр. “Саха ыала” – оҕону иитиигэ, ыал кыһалҕатыгар, социальнай өйөбүлгэ, аҕам саастаахтарга ананар, эмп-том, чэгиэн буолуу кистэлэҥин арыйар. “Дьулурҕан”- спорт буруолуу сылдьар сонуннара. Тустуу, мас тардыһыы, араас чемпионаттар уонна турнирдар. Ырытыылар, быһаарыылар, кэпсэтиилэр.
Абааһылаах кэпсээннэр, таптал сэһэнэ
Саха дьоно кутталлааҕы, иччилээҕи, дьиктилээҕи ааҕарын олус сөбүлүүбүт. «Хараҥа хоско» абааһылаах кэпсээннэри, “Арыллыбатах аартыктарынан” олоххо буолбут түбэлтэлэри аах. “Чараҥ» рубрикаҕа эдэр суруйааччылар “Тыл кыһата” суруйааччылар саҥа кэпсээннэрэ, хоһоонноро киириэхтэрэ. Оттон “Дууһа кыланыыта», “Суорҕан анныгар”, “Сүрэх кистэлэҥэ” рубрикалар эһигини умсугутуохтара.
Сайпыт олус дөбөҥ
Санааҕын үллэстиэххин баҕараҕын – суруй. Регистрация бэрт боростуой. Сайтка хантан баҕарар, хаһан баҕарар киирэбит: көмпүүтэртэн, планшеттан эбэтэр төлөпүөнтэн. еdersaas.ru диэн суруйаргын умнума.
Төлөпүөҥҥэ хачайдаа
“Эдэр саас» мобильнай сыһыарыытын төлөпүөҥҥэ хачайдыаххын сөп. PlayMarket эбэтэр App Store маҕаһыынтан “ЭДЭР СААС” булабыт. Хачайдыыбыт. Саҥа матырыйаал тахсыбытын сыһыарыы эйиэхэ “хобуоччулаан” биэриэҕэ.
Көр. Аах. Туһан
Билигин “Эдэр саас” хаһыат матырыйааллара Facebook, Vkontakte, Instagram, Twitter, YouTube социальнай ситимнэргэ онлайн тахса тураллар. Онно биһигини 25 000 тахса киһи ааҕара санаабытын көтөҕөр, инникигэ кынаттыыр.
«Саха сирэ» хаһыат суруналыыстара бэлэмниир чаҕылхай матырыйаалларын интернеккэ аах, көр, туһан! Еdersaas.ru сайты кытта бииргэ буол!
Надежда САМСОНОВА.