Таатта улууһугар аҕам саастаахтар күннэригэр аналлаах дэкээдэ куйаар ситиминэн да буоллар, өрө көтөҕүллүүлээхтик, сэргэхтик ыытылынна. Хоруона хамсыга көхтөөх дьону муннукка хаайбата, санааларын баттаабата.
Ретро-муода куонкуруһугар барыта 17 киһи кыттыбыт. ССРС (Сэбиэскэй Сойуус) кэмин саҕана кэтиллибит таҥастары көрдөрүүгэ, хаартысканан күрэхтэспиттэр. Күөн күрэс онлайн-форматынан Дьохсоҕон, Чөркөөх, Тыараһа, Даайа Амма, кө5үлээһиннэринэн,, тэрийиилэринэн ыытыллыбыт.
—Бэртээхэй куонкурус нэһилиэктэргэ улахан сэргэхсийиини таһаарда. Уопсайа 17 киһи кытынна. Кыттааччылар хаартыскаҕа түһэн, тэрийээччилэргэ батсаабынан ыыппыттарын, үс киһиттэн састааптаах дьүүллүүр сүбэ көрдө.
Дьүүллүүр сүбэҕэ Яковлева М.П. — П.В.Толстяков аатынан норуот тыйаатырын режиссера (Чөркөөх ), Григорьева У.С. — дизайнер идэлээх эдэр ийэ (Кыйы) уонна Бысыина В.П. — эбии үөрэхтээһин үрдүк категориялаах педагога, технология учуутала (Боробул) үлэлээтилэр. Кинилэр бииртэн-биир үчүгэй хаартыска болҕомтону тардыбытын, онон илин-кэлин түсүһүүлээх кытаанах күрэс буолбутун бэлиэтээтилэр.
Күрэс түмүгэ маннык таҕыста: I миэстэ -Попова Мария Семеновна (Дьохсоҕон), II миэстэ – Слепцова Анна Николаевна (Тыараһа), III миэстэ – Аржакова Анастасия Михайловна (Чөркөөх) ыллылар.
Анал ааттар, “Эдэр саас күлүм түгэнэ…» — Ефремова — Бокойорова Анастасия Николаевнаҕа (Даайа Амма)
уонна “Мин кэллим алааспар, күлүм күһүннүүн көрсүһэ…» — Попов Серафим Львовичка (Дьохсоҕон) бэрилиннилэр.
Кыайыылаахтар уонна номинаннар грамотанан, бириистэринэн, бары кыттааччылар туоһу суругунан наҕараадаланнылар. Барыта нэһилиэктэрин кулууптарыгар тиксэриллэр.
Күөн күрэс олус үчүгэйдик барда. Дьон-сэргэ наһаа сэргэхсийдэ, үөрдэ-көттө, астынна. «Маннык куонкуруһу өссө оҥорооруҥ» диэн этээччи элбэх буолла.
Түмүккэ, күрэскэ кыттыбыт бары дьоммутугар барҕа махталбытын тиэрдэбит. Кэлэр да өртүгэр тэрээһиннэрбитигэр бу курдук көхтөөхтүк кытта туралларыгар баҕарабыт,—диэтилэр тэрийээччилэр.