“Эдэр профессионаллар” эрэгийиэннээҕи күрэхтэһиигэ саҥа компетенцияны киллэрдилэр
“Эдэр профессионаллар” эрэгийиэннээҕи чөмпүйэнээт устуоруйутыгар аан бастакытын “ойууру туһаныы уонна чөлүгэр түһэрии инженерията” диэн компетенцияны киллэрдилэр. Бастакы кыайыылаахтар билиннилэр.
Идэ, үөрэххэ уларыйыылар, куонкурустар олоҕу кытта тэҥҥэ хардыылыыллар дииллэрэ оруннаах. Ол курдук, ааспыт сайын Саха сиригэр улахан баһаардар тахсан, билигин ойууру чөлүгэр түһэрии боппуруоһа хаһааҥҥытааҕар даҕаны суолталаах. Ону учуоттаан, СӨ Идэҕэ урутаан бэлэмниир киинэ (ЦОПП) Хотугу-Кавказ аграрнай-технологическай кэллиэһин кытта бу күннэргэ ыытыллыбыт “Эдэр профессионаллар” (ВорлдСкиллс) эрэгийиэннээҕи аһаҕас X чөмпүйэнээт күрэхтэһиитигэр “ойууру туһаныы уонна чөлүгэр түһэрии инженерията” диэн компетенция киирэрин көҕүлээтилэр. Бастакы тэрээһиҥҥэ, уопсайа, биэс устудьуон кытынна.
Эрэгийиэннээҕи чөмпүйэнээт кыайыылааҕа, Дьокуускайдааҕы тыа хаһаайыстыбатын тиэхиньикумун ойуур уонна ойуур пааркатын хаһаайыстыбатын 2-с кууруһун устудьуона Петр Ильин:
— Былырыын өрөспүүбүлүкэтээҕи “Идэҕэ инникигэ хардыы” эдэр чинчийээччилэр пуорумнарыгар “Спутник көмөтүнэн ойууру кэтээн көрүү” диэн тиэмэнэн кыттан миэстэлэспитим. Быйыл мин үөрэнэр салаабынан “Эдэр профессионаллар” күрэхтэһиигэ саҥа компетенция аһыллар, кытын диэбиттэригэр сөбүлэспитим. Икки нэдиэлэ курдук бэлэмнэммиппит. Куонкурус түөрт күн устата барда. Ойууру туһаныы уонна чөлүгэр түһэрии докумуонун толоруу, бэлэмнээһин, судаарыстыбаннай реестрга даннайдары киллэрии, беспилотнай көтөр аппараатынан ойууру сөпкө туһаныыны уонна чөлүгэр түһэриини кэтээн көрүү курдук түһүмэхтэрдээҕэ.
Куонкуруска кыттан иҥэриммит билиибин быраактыкаҕа бэрэбиэркэлэнэн көрдүм. Туһалаах компетенция, — диэн санаатын үллэстэр.
Кыттааччыта төһө да аҕыйаҕын иһин, ханнык баҕарар куонкурус курдук билиини, сатабылы эрэйэр. Петр салгыы муус устарга ыытыллар Арассыыйатааҕы сүүмэрдиир чөмпүйэнээккэ Саха сирин аатыттан кыттарга бэлэмнэнэр.
“Ойууру туһаныы уонна чөлүгэр түһэрии инженерията” компетенция кыайыылаахтара:
1м. Петр Ильин (Дьокуускайдааҕы тыа хаһаайыстыбатын тиэхиньикума),
2 м. Алина Попова (Дьокуускайдааҕы тыа хаһаайыстыбатын тиэхиньикума),
3 м. Ньургуйаана Андреева (Дьокуускайдааҕы тыа хаһаайыстыбатын тиэхиньикума).
Людмила ПОПОВА, “Саха сирэ” хаһыат, edersaas.ru
Хаартыска: Идэҕэ урутаан бэлэмниир киин.