Муус устар 20 күнүгэр Намҥа Олоҥхо дьиэтигэр сэргэх тэрээһин буолла. Ил Дархан биллэрбит Сомоҕолоһуу сылын чэрчитинэн «Ыччат олоҥхоһут» өрөспүүбүлүкэтээҕи түмсүү салайааччыта, ХИФУ Олоҥхо институтун секторын сэбиэдиссэйэ Юрий Борисов «Ааттаах олоҥхоһуттар аартыктарынан, ытык кырдьаҕастар ыллыктарынан» диэн өрөспүүбүлүкэтээҕи экспериментальнай бырайыагын түмүктүүр дьоро күнэ буолла.
Ол курдук, Юрий Борисов быйыл Олоҥхо ыһыаҕын көрсө бу бырайыагынан Нам улууһун 12 нэһилиэгэр: Намҥа, Хамаҕаттаҕа, Көбөкөҥҥө, Фрунзеҕа, Партизаҥҥа, I Хомустаахха, Үөдэйгэ, Бөтүҥҥэ, Модукка, Хатырыкка, Кыраап Биэрэгэр уонна Никольскайга былыргылыы, кэрийэ сылдьан олоҥхолоото. Итини тэҥэ, олоҥхо ырыатыгар-тойугар маастар-кылаастары оҥордо.
—Ырытан көрөн бэлиэтэниилэрим көрдөрөллөрүнэн, толору олоҥхобун уопсайа 332 киһи истибит. Түмүктүүр тэрээһиммэр «Баһырҕастаах ааттаах Баабый Баатыр» олоҥхобун икки чаас устата толорон иһитиннэрдим. Үөрбүтүм баар, бүгүн 50-тан тахса истээччи кэлбит. Ону тэҥэ, бииргэ үлэлиир кэллиэгэлэрим уонна биир дойдулаахтарым «Амма» түмсүүттэн анаан-минээн миигин истэ кэлбиттэриттэн олус долгуйдум. Онон, сүһүөхтээх бэйэм сүгүрүйэн, хоолдьуктаах бэйэм хоҥкуйан туран, күндү ыалдьыттарбар махтанабын. Бу бырайыак ситэн-хотон, үүнэн-сайдан үрдүк ситиһиилээхтик ааспытыгар бары күүс-көмө, сүбэ-ама буолбут дьоммор сиртэн халлааҥҥа диэри махталбын биллэрэбин, — диэтэ эдэр олоҥхоһут, филология наукатын хандьыдаата Юрий Борисов.
Киниэхэ дьоһуннаах үлэтин иһин бу күн Махтал суруктар, өйдөбүнньүк бэлэхтэр туттарылыннылар. Юрий Петрович бу бырайыага кэтит кэскиллээҕин көрдөрдө. Онон, инникитин да салҕана туруоҕа уонна өссө кэҥээн иһиэҕэ диэн эрэнэбит.
PS: Олоҥхо тыйаатыра махталын биллэрэн, Юрий Борисовка сахалыы саҥа таҥас тиктэрэн биэриэх буолла.
Татьяна МАРКОВА, «Саха сирэ» хаһыат, edersaas.ru