Бэҕэһээ эбиэт кэннэ өрөспүүбүлүкэтээҕи лиссиэй-интэринээтигэр олохтонон олорор Мультимедийнэй оскуола эдэр кэрэспэдьиэннэрин саамай үлэлии олорор кэмнэригэр тиийдим.
edersaas.ru
Өйдөөх оҕолор түмсүбүт кииннэрэ диэх курдук, бэрт элбэх оҕо баар эрээри, ханна да күлсүү-салсыы, улаханнык кэпсэтии суох. Муннукка бөлөҕүнэн олорор оҕолор тугу эрэ ырыталлар, кэпсэтэллэр.
Ким эрэ сүүрэн кэлэн, көмпүүтэргэ матырыйаалын бэчээттиир.
Ким— бэйэ-бэйэтин кытта английскайдыы кэпсэтэн, ыкса билсэр.
Мин биир кыыстан: «Манна араас дойдуттан кэлбит эдэр кэрэспэдьиэннэр бааллар дииллэр. Миэхэ, баһаалыста, биир эмэ олус интэриэһинэй оҕону билиһиннэриэҥ дуо?» — диэн ыйыппыппар, толкуйдуу барбакка: «Мин волонтербун. Билигин Швецияттан сылдьар Оскары билиһиннэриэм«, — диэт, биир ачыкылаах уолу аҕалан иннибэр олордон кэбистэ. Киһим көрөн-истэн, боччумнаах уол буолан биэрдэ.
Оскар нууччалыы билбэт эбит. Ол иһин Ленскэйтэн сылдьар эдэр кэрэспэдьиэн Света Титова тылбаасчыттаах кэпсэттибит.
— Мин аатым Oskar Vretemark. Ийэм — саха. Кини — учуутал. Аҕам омугунан швед. Инженеринэн үлэлиир. Аан дойдутааҕы интеллектуальнай оонньуулар Дьокуускайга буолалларын туһунан ийэм аймахтара биллэрбиттэрэ. Мин суруналыыстыканан дьарыктанар буоламмын, ийэм тэрээһин пресс-сулууспатыгар үлэлэтэ ыыппыта. Манна хас да хайысхаҕа хайдыһан үлэлиибит. Мин телевидениеҕэ үлэлэһэбин. Суруналыыстар 40-чабыт. Биһигини барыбытын омуктар олорор уопсайдарыгар олохтообуттара. Саха сиригэр маннык сылаас буолуо диэбэтэҕим. Наһаа куйаас эбит, — диэн кэпсиир Оскар. Эдэр кэрэспэдьиэн номнуо ыалдьыттартан интервью ылан, матырыйаалын бэлэмнээн олорор кэмигэр түбэспиппин.
Биир улахан хоско бэйэ-бэйэлэригэр мэһэйдэспэккэ, күн солото суох үлэлии олорор оҕо үгүс. Кинилэртэн биирдэстэрэ — Артем Сивцев. Уол Чурапчы 1 №-дээх оскуолатын 8-с кылааһын бүтэрбит.
— Ленскэй кыраайга «Туймаада» олимпиадатыгар кыттыахтаах этим да, баалым тиийбэтэҕэ. Ол иһин Интеллектуальнай оонньууларга волонтер быһыытынан кыттабын. Уопсайа 150-тан тахса волонтер үлэлиибит. Сахалинтан эмиэ волонтердар кэлбиттэрэ. Тыа хаһаайыстыбатын академиятын уопсайыгар олоробут, — диэн кэпсиир Артем. Эдэр киһи араас омук дьонун кытта алтыһарын олус сөбүлүүр эбит. Онон үрдүк үөрэҕи баһылаан, омук сиригэр үлэлиир баҕалаах.
Артемнуун кэпсэтэн баран, тахсар ааҥҥа баран иһэн, биир сытыы кыысчаан «Кэскил» Оҕо бэчээтин дириэктэрэ Анжелика Андреевалыын кэпсэтэ олорорун иһиттим. Волонтердар: «Ээ, арба ити кыысчаан эмиэ саха ийэлээх. Кини Дубайтан сылдьар«, — диэтилэр. Мин эдэр кэрэспэдьиэн интервью ылбытын кэннэ, кыысчаанныын анаан кэпсэттим. Киһим бэрт чобуо, нууччалыы билэр киһи буолан биэрдэ.
— Мин София диэммин. Уон саастаахпын. Дубайтан сылдьабын. Ийэм — саха, аҕам — эфиоп. Саха сиригэр иллэрээ сыл уонна былырыын сылдьыбытым. Уонна, арааһа, түөрт ыйдаахпар аҕала сылдьыбыт буолуохтаахтар. Онон Саха сиригэр төрөөбүт дойдубар курдук кэлэбин. Мин интервью ыларбын наһаа сөбүлээтим. Манна үлэлиир наһаа үчүгэй, — диэн санаатын үллэстэр Sofia Gebries.
… Ити курдук, эдэр кэрэспэдьиэннэр сытыы, кэпсээннээх-ипсээннээх дьон эбиттэр. Буолумуна, суруналыыстар итинник эрэ буоллахтарына, үгүс киһини кытта кылгас кэмҥэ үспүөйдээн алтыһан ааһар, элбэҕи-билэн көрөн, сырдатар буоллахтара.
Нэдиэлэ устата кинилэри, дьэ, үгүс сурук-тайма күүстээх үлэтэ күүтэр.
Эдэр кэллиэгэлэрбэр бу күннэргэ ситиһиилээх үлэни баҕарабын!
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.