Норуоттар икки ардыларынааҕы I Интеллектуальнай оонньууларга “Кэскил” оҕо бэчээтин кыһата эдэр кэрэспэдьиэннэри үлэлэттэ. Мультимедийнэй оскуола – Оонньуулар биир хайысхаларынан буолар. Уопсайа, 150 оҕо сайаапка ыыппытыттан, 40 оҕо сүүмэрдээһини ааспыт. Илим хараҕар хаалбыттар маҥнайгы улахан сүрэхтэниилэрин аастылар – Интеллектуальнай оонньууларга үлэлээтилэр.
Сахамедиа, edersaas.ru
Кинилэр эбээһинэстэрэ тугуй? Урутаан эттэххэ, оҕолор суруналыыстартан итэҕэһэ суох бустулар-хаттылар, өрөспүүбүлүкэ, министиэристибэ салайааччыларын, ыалдьыттары, кыттааччылары кытта кэпсэттилэр. Түөртүү-биэстии буолан бөлөхтөргө арахсан, чопчу көрүҥнэргэ сыһыарыллыбыттар. “Дьону кытта кэпсэтэр үчүгэй. Киһи элбэҕи билэр-көрөр. Ол кэнниттэн кэлэн суруйара уустук эбит. Баай тылынан дьон өйдүүрүн курдук суруйар наада. Сорохпут нууччалыы, сорохпут сахалыы суруйабыт. Салайааччыларбыт – “Кэскил” хаһыат суруналыыстара Айыына Ксенофонтова, Таисия Алексеева, Юлия Попова, Алексей Васильев буолаллар. Суруйууларбытын кинилэр көрөллөр-истэллэр, онтон сүүмэрдээн тылбаасчыттарга биэрэллэр”, — диэн санааларын үллэстэллэр.
Эдэр кэрэспэдьиэннэр суруйууларынан кыттааччыларга аналлаах күннүктэри (дневник) таһаардылар. Үлэлэрин быыһыгар Айыына Стручкова (Дьокуускай куорат 12-с №-дээх оскуолата), Валерия Ноева (Мэҥэ Хаҥалас, Бэдьимэ), Лена Ефремова (Чурапчы, Болтоҥо), Кристина Егорова (Өрөспүүбүлүкэтээҕи лиссиэй-интэринээт), Айсен Бочкарев (Уус Алдан, Мүрүтээҕи Уолан гимназия) өрөспүүбүлүкэ сүрүн хаһыата “Саха сирэ” кылаабынай эрэдээктэрин Прокопий Бубякины кытта көрүстүлэр.
Оҕолор хаһыакка интэриэстэрэ элбэх эбит. Хаһыат хас балаһалааҕыттан саҕалаан, суруйар тиэмэлэригэр, хаһыат форматыгар, хайдах тиэрдиллиитигэр тиийэ туоһуластылар.
Прокопий Петрович оҕолор хас биирдии ыйытыыларыгар хоруйдаата, суруналыыс диэн кимин, туох эбээһинэстээҕин, ханнык хаачыстыбалар ирдэнэллэрин кэпсээтэ, сүбэ-ама биэрдэ.
Людмила ПОПОВА, “Саха сирэ” хаһыат, edersaas.ru