Мэлдьэхси нэһилиэгэр 113 биэнсийэлээх олорор, онтон 67-тэ үлэ, үһэ тыыл бэтэрээннэрэ. Бэтэрээннэр сэбиэттэрин СӨ Бочуоттаах бэтэрээнэ, СӨ култууратын туйгуна Аграфена Гаврильевна Васильева 16-с сылын салайар. Бэйэтэ кулууп үлэһитэ буолан, тэрийэр дьоҕурдаах. Оттон бэтэрээннэр нэһилиэккэ ыытыллар тэрээһиннэргэ бэрт көхтөөхтүк кытталлар.
Дьон-сэргэ, тыа сирин ыалын чэрчитинэн, үүт, эт туттарар. Нэһилиэккэ күөх төлөн киирэн, кырдьаҕастарга көмө буолла. Оттон оскуола оҕолоро, ыччаттар мас хайытан, муус ылан, тимуровскай үлэлэри ыыталлар, аҕам саастаахтарга көмөлөһөллөр. Олохтоох агрооскуола кырдьаҕастарга сылын аайы хортуоппуй биэрэр үтүө үгэстээх. Оскуола дириэктэрэ Лариса Сыромятникова үөрэнээччилэриниин кэлэн, ытык дьону истиҥник эҕэрдэлиир. Кырдьаҕастар дэкээдэлэрэ, Улуу Кыайыы күнүгэр аналлаах биэчэрдэр, үбүлээрдэри чиэстээһин мэлдьи ыытыллар.
Култуура уонна спорт эстэпиэтэтигэр бэтэрээннэр көхтөөхтүк кытталлар. Кэнсиэргэ сыана бэтэрээннэрэ Роман Романов, Лука Попов, Семен Герасимов, Полина Захарова ырыаҕа, “Далбар” бөлөх үҥкүүгэ, Надежда Андросова оһуохайга, спорт көрүҥэр — дуобакка Василий Куприянов, Акулина Семенова, Николай Степанов, хабылыкка, теннискэ Василий Охлопков, быыстапкаҕа Любовь Степанова, Людмила Охлопкова, Ирина Макарова кыбытыгынан тигиигэ, норуот маастара Маргарита Степанова иискэ, Иннокентий Куприянов тимиргэ, Анатолий Охлопков маска үлэлэринэн дьон биһирэбилин ылан, дьүүллүүр сүбэнэн бэлиэтэннилэр.
Соторутааҕыта “Далбар” үҥкүү бөлөҕө Чурапчы улууһун Мындаҕаайытыгар куонкуруска кыттан, “Бастыҥ муcукаалынай доҕуһуоллаах үҥкүү” анал ааты ыллылар. Көлүөнэнэн күрэхтэһиигэ Cаҥа дьыллааҕы куонкуруска бэтэрээннэр кыайыылааҕынан тахсаннар, 10 тыһыынча солкуобай харчынан наҕараадаламмыттара. Ол иһин, Аан дойду дьахталларын күнүгэр Дьокуускайга кэлэн, култуурунайдык сынньанныбыт. Олохтоох салалта тырааныспарынан хааччыйан, баһылыкпыт Валерий Никифоровка махтанабыт.
Билигин Улуу Кыайыы күнүн көрсө, сэриигэ кыттыбыт, тыылга үлэлээбит бэтэрээннэри үйэтитиигэ үлэ барар. Улуус, нэһилиэк таһаарар кинигэлэригэр матырыйаалы түмүүгэ кыраайы үөрэтээччи Надежда Андросова, педагогическай үлэ бэтэрээнэ Александра Степанова үлэлэһэн, эдэрдэри көҕүлүүллэр. Ити курдук, нэһилиэк бэтэрээннэрэ эдэр көлүөнэҕэ үтүө холобур буолаллар.
Мэлдьэхситтэн Надежда АНДРОСОВА,
Мэҥэ Хаҥалас.