Аан дойду үрдүнэн коронавирус дьаҥа тарҕанан үлэҕэ-хамнаска, тэрээһиҥҥэ төһө да мэһэйдэри үөскэппитин иһин, аҕам саастаахтар күннэригэр улуустар, нэһилиэктэр кырдьаҕастарын эҕэрдэлииллэрин умнубатылар.
Горнай улууһугар кырдьаҕастар уонна инбэлииттэр олорор интэринээт-дьиэлэригэр социальнай үлэҕэ эппиэттээх М.А.Прокопьева көҕүлээһининэн, Бэрдьигэстээх эдэр ийэлэрэ, Н.А.Бурнашева («Яхонт» көмүс салона), Нь.В.Иванова («Принтекс» фотокиин), С.С.Михайлова («Sardi_shop berd»), кондитер Х.А.Осипова, «Уйгууна» (сибэкки салона) сэмэй бэлэхтэрин анаан ыыттылар. Сир аһыттан барыанньа, отон, туорт, сибэкки дьөрбөлөрө, шариктар, ичигэс таҥас-сап уонна кэлэр сылга улуустааҕы «Үлэ күүһэ» хаһыакка сурутаннар, бэлиэ күҥҥэ интэринээт-дьиэ олохтоохторун сэргэхситтилэр, үөртүлэр. Оттон «Сардаана» уһуйаан уонна «Чэмэлиидэ», «Чуораанчык» бэлэмнэнии бөлөх иитиллээччилэрэ (иитээччилэр М.А.Аргунова, Н.К.Оленова, Р.Е.Дунаева) эрдэттэн анаан, кыһаллан оҥорбут үчүгэйкээн аккырыыккаларын бэлэх уунан ыыппыттара, кырдьаҕастары улаханнык долгутта, манньытта.
Аҕам саастаахтар эдэр көлүөнэ дьон, кырачаан оҕолор болҕомтолоруттан, истиҥ сыһыаннарыттан улаханнык үөрбүттэр, махтал тылларын тиэрдибиттэр.