Киһи ис туруга мөлтөөтөҕүнэ, ыксаллаах түгэҥҥэ түбэстэҕинэ киниэхэ көмөҕө бастакынан быраастар кэлэллэр. Сунтаардааҕы кииннэммит балыыһа хирургияҕа отделениетыгар эдэркээн уолаттар үлэлээн эрэллэр. Онтон биирдэстэрэ — хирург-травматолог Семен Сутаков. Амматтан төрүттээх уол медицинскэй үөрэҕи бүтэрэн, “Земскэй доктор” тосхолунан Сунтаарга үлэлии кэлбитэ сыл аҥаара буолла.
edersaas.ru
Эдэр хирург кэлиэҕиттэн араас уустук эпэрээссийэлэр оҥоһуллар буоллулар. Ол иһигэр, холецистэктомия, фимоз, араас оһолго түбэспиттэри эпэрээссийэлээһин, онтон үксэ үөс тааһын ылыы. Урукку кэмҥэ бу ыарыыга эпэрээссийэни сылга иккитэ-үстэ эрэ оҥорор буоллахтарына, хайы сах биэс ый иһигэр 17-ни оҥордулар. Атын да ыарыыларга эдэр хирург үлэтэ олус сатабыллаах, ону ыарыһахтар “Ыарыыны – харахтан сыыһы ылбыт курдук эмтиир. Илиитэ сымнаҕаһа, туттара-хаптара, кэпсэтэрэ, дьоҥҥо сыһыана үчүгэйэ ону туоһулуур”, — дииллэр. Хирург үлэтэ олус эппиэтинэстээх. Ону эдэр дьон билинэн, маннык кэскиллээхтик үлэлииллэрин көрөн киһи үөрэр.
Сотору анал тэрил кэллэҕинэ, аны, варикоһу эпэрээссийэлиир кыахтаныахтара. Дьэ, оччоҕуна сунтаардар элбэх ыарыыбыт айакатын бэйэбит дойдубутугар эмтэнэр буолуохпут.
Мария КОБЕЛЬЯНОВА — ТУСКУЛААНА, edersaas.ru