Ытык Күөлгэ илин эҥэр улуустартан 70 «эдэр гвардеец» икки күннээх үөрэххэ түмүстэ. Бу тэрээһин кэмигэр лиэксийэлэри иһиттилэр, трениннэр ыытылыннылар, дьыалабыай оонньуу тэрилиннэ. Мэҥэ Хаҥалас, Таатта, Томпо, Уус Алдан уонна Чурапчы улуустарыттан кэлбит актыбыыстар үлэ былаанын дьүүллэстилэр.
Семинарга политолог, историческай наука хандьыдаата Ольга Парфенова дойдуга политическай балаһыанньа туһунан лиэксийэтин сэргээтилэр. Ол кэнниттэн СӨ Ил Дарханын иһинэн Инновационнай менеджмент Үрдүкү оскуолатын преподавателлэрэ Наталья Ефимова уонна Елена Васильева саҥарыы маастарыстыбатыгар үөрэттилэр. Ыччат “Эдэр гвардия” үлэтин хайысхатын ырытта, волейболга күрэхтэстэ.
Семинар иккис күнүгэр политическай темэлэргэ сытыытык мөккүстүлэр. “Биир ньыгыл Россия” партия регионнааҕы салаатын ситэриилээх кэмитиэтин салайааччытын бастакы солбуйааччы Василий Амбросьев уонна Саха сирин эдэр гвардеецтарын бас-көс киһитэ Александр Сусоев “Хайдах таһаарыылаах үлэлээх салайааччы буолуохха сөбүй? диэн тиэмэҕэ лиэксийэ аахтылар. “Ыччат быыбардыыр штаба” дьыалабыай оонньуу сэргэхтик ааста. Онон актыбыыстар элбэҕи билэн-көрөн тарҕастылар.
Женни СТРЮКОВА, edersaas.ru