Эдэр гвардеецтар Дьокуускайга Очиченко уулуссатын 57 №-гэр кыылы-сүөлү тутар пууҥҥа көмөлөстүлэр.
Хаһаайына суох бэйдиэ сылдьар кыыл-сүөл кыһалҕата ханна да сытыытык турар. Куораттарга бу боппуруоһу быһаарар үлэлэр ыытыллаллар. Маныаха ханна да анал пууннары тэрийэллэр.
Дьокуускайга бэйдиэ сылдьар кыылы-сүөлү тутарга анаан пуун 2015 сылтан үлэлиир. 2020 сыл атырдьах ыйыгар пуун «Помоги выжить» пуондаҕа бэриллибитэ.
Саха сирин эдэр гвардеецтарын көхтөөх кыттааччыта Алина Попова: «Нэдиэлэ анараа өттүгэр биһиги кыылы-сүөлү тутар пууҥҥа дуогабардаһа тиийэ сылдьыбыппыт. Онно туох наадатын чопчулаабыппыт. Онтон бэйэбит харчыбытыттан көмөнү оҥорорго быһаарыммыппыт. Маннык сирдэргэ кыыл-сүөл аҕыйах буолуон баҕарабыт. Дьоҥҥо туһаайан этиэм этэ, иитэ ылбыт кыылгытын-сүөлгүтүн быраҕан кэбиһимэҥ. Кинилэр кыһамньыга, болҕомтоҕо, тапталга эмиэ наадыйаллар эбээт».
Эдэр ыччат көмөлөһөн пууҥҥа ыттарга уйалары оҥордулар, 30 кг аһылыгы, иһити-хомуоһу, ол бу наадалаах тэриллэри биэрдилэр.
Үтүө санаалаах дьон туора турумаҥ.
+1
+1
+1
+1
+1
+1
+1