Өрөспүүбүлүкэ Ил Дархана Егор Борисов ааспыт субуотаҕа эдэр госсулууспалаахтары кытары көрүстэ. Бүгүҥҥү күҥҥэ Саха сирин үрдүнэн толорор былааска 35-гэр диэри саастаах 795 эдэр чунуобунньук үлэлии-хамсыы сылдьар. edersaas.ru
Ил Дархан сэһэргэһээччилэригэр, өрөспүүбүлүкэ уонна бүтүн дойду интэриэстэрин туруулаһыҥ, талан ылбыт эйгэҕитигэр дириҥ билиилээх буолуҥ диэн сүбэлээтэ. Егор Афанасьевич Саха сирэ Арассыыйаны кытары тэҥҥэ экономика саҥа таһымыгар тахсан эрэрин бэлиэтээтэ, маныаха хас биирдиилэригэр экономикаҕа быһаарсар буолалларыгар сүбэлээтэ. “Куруук бэйэҕитин сайыннарыҥ, үөрэниҥ. Үгүскүт инновационнай менеджмент Үрдүкү оскуолатыгар үөрэнэр, анал куурустары ааһа сылдьар буолуохтаах. Үлэҕит, үөрэххит быыһыгар онлайн-лиэксийэлэри истиҥ, кинигэлэри ааҕыҥ. Бу аан дойдуга туох уларыйыы барарын билэ сылдьаргытыгар туһалыаҕа”, — диэн бэрэсидьиэн санаатын үллэһиннэ. Маны таһынан, чунуобунньук хайа баҕарар түгэҥҥэ бэйэ бодотун тардыныахтаах, киһи сиэринэн сылдьыахтаах диэн бэлиэтээтэ. Эдэр дьоҥҥо идэлээх буолалларыгар уонна киһи быһыытынан үтүө хаачыстыбаларын өрө тута сылдьалларыгар баҕарда.
Көрсүһүүгэ саҥа тэриллибит эдэр госсулууспалаахтар координационнай сэбиэттэрин салайааччы Марина Карамзина: “Госсулууспалаах судаарыстыба тутулун, систиэмэни иһиттэн билэр, онон буола турар быһыыны-майгыны тута билэн, түргэнник дьайыан сөп. Манна күннээҕи үлэбитигэр туттар бырайыагы иилээн-салайан ыытар сатабылбыт, министиэристибэлэр, биэдэмистибэлэр дааннайдара уонна ырытан, билгэлээн көрөрбүт көмөлөһөр”, — диэн бэлиэтээн тыл эттэ.
Маны таһынан, эдэр чунуобунньуктарга наставничество институтун, ыччат экологическай дружиналарын, бырамыысыланнас, геология исписэлиистэрин сүлүөттэрин уонна биир информационнай систиэмэни тэрийии туһунан этиилэр киирдилэр. Эдэрдэр үлэлэрэ тахсыылаах буоларын туһугар, “Саха сирин бастыҥ эдэр госсулууспалааҕа” куонкуруһу ыытыахха диэн кэпсэттилэр. Ил Дархан эдэр чунуобунньуктар тэрилтэлэргэ стажировка ааһалларын туһунан этиини биһирээтэ.
Түмүккэ Егор Афанасьевич эдэр госсулууспалаахтар ыытар үлэлэрин сыаналыырын, ыччат Саха сирин инники сайдыытын сөпкө өйдүүрүн биллэрдэ.
Айтана Аммосова, «Саха сирэ» хаһыат, edersaas.ru
Мария Васильева хаартыскаҕа түһэриилэрэ.