Ыраахтааҕы былааһын саҕана Саха сиригэр маҥнайгы бэтэринээрийэ сулууспата үөскээбитэ быйыл 120 сылын туолла. Туох кистэлэ кэлиэй, ааспыт үйэ 60-с сылларыгар диэри, сүнньүнэн, дойду киин уобаластарыттан кэлбит исписэлиистэр үлэлииллэрэ. Онтон СГУ иһинэн тыа хаһаайыстыбатын факультета аһыллыаҕыттан бэтэринээр идэтин баһылаабыт олохтоох ыччат сыыйа элбээбитэ.
Бүгүн өрөспүүбүлүкэ бэтэринээринэй сулууспата сүүс бырыһыан олохтоох каадыртан турар диэтэххэ, сымыйа буолбатах. Ити кэм устатыгар хас даҕаны көлүөнэ солбуста. Киһи үөрэрэ баар, кэлиҥҥи сүһүөх ыччаттан сонун, сэргэх, аныгылыы көрүүлээх-истиилээх эдэр дьон бэтэринээр уустук, ыарахан үлэтигэр таһаарыылаахтык үлэлии-хамныы сылдьаллар. Станислав Эверстов – оннук исписэлиистэртэн биирдэстэрэ, кини Мэҥэ Хаҥалас улууһугар Быраматааҕы бэтэринээрийэ пуунугар сэбиэдиссэйдиир.
Станислав 2004 с. Дьокуускайдааҕы тыа хаһаайыстыбатын техникумун үөрэнэн бүтэрбитэ. Онтон 2007 с. Нам уола Мэҥэ сиригэр үлэлии кэлбитэ. Эдэр исписэлииһи маҥнай Тыыллыматааҕы учаастакка бэтэринээр-бырааһынан анаан үлэлэппиттэрэ. Кини алта сыл устатыгар аҕа саастаах биир идэлээхтэриттэн бэтэринээр үлэтин кистэлэҥэр элбэххэ үөрэммитэ, уһуйуллубута. Тыыллыма олохтоохторо бүгүрү үлэһит уолу сөбүлээбиттэрэ. Ынах төрүүрүгэр моһуогурдун, сүөһү-сылгы оһоллоннун, ыарыйдын – эдэр бэтэринээр барытыгар күнүс-түүн сүүрүүнэн кэлэн өрүһүйэрэ.
Улуустааҕы бэтэринээрийэ салалтата кэскиллээх эдэр исписэлииһи улуус биир кытыы нэһилиэгэр, Холгумаҕа, Быраматааҕы бэтэринээрийэ пуунун салайтара ыыппыта. Итэҕэли түһэн биэрбэтэ. Үс сыл тухары үлэтигэр эҥкилэ суох бэриниилээҕин, идэтин толору баһылаабытын көрдөрдө. Биир идэлээхтэрэ бэлиэтииллэринэн, Станислав Николаевич барытын билэ-көрө сатыыр баҕалаах, үлэтигэр саҥаттан саҥа ньымалары туһанар, ол туһунан сүбэлэһэр уонна бэйэтин үөрүйэҕиттэн үллэстэр.
Станислав Эверстов ити курдук киниэхэ итэҕэйиллибит нэһилиэк сиригэр-уотугар сыстыганнаах, дьон-сэргэ олоҕор кутталлаах ыарыы турбатын туһугар бары ирдэбили чуолкайдык тутуһан-толорон, кыһамньылаахтык сыһыаннаһан үлэлии сылдьар. Ол даҕаны иһин Бырама ыаллара быр-бааччы олохтоохтор, сүөһүлэрин-астарын дэлэтэр дьүккүөрдээхтэр. Лариса Макарова салайааччылаах өрөспүүбүлүкэ бэтэринээрийэтин департамена Бэтэринээрийэ үлэһитин күнүнэн төлөннөөх эҕэрдэтин ыытар. Станислав Николаевич, тыа сирэ сайдарын туһугар өссө даҕаны айымньылаахтык, ситиһиилээхтик үлэлии-хамныы тур!
Василий НИКИФОРОВ, “Саха сирэ” хаһыат, edersaas.ru