Бу күннэргэ Петрозаводскайга түмүктэммит 2003-2004, 2005-2006 сс. төрүөх оҕолор ортолоругар чэпчэки атлетикаҕа Арассыыйаҕа бастыыр иһин күрэхтэһиигэ Саха сирин эдэр спортсменнара сэттэ мэтээли ылары ситистилэр.
edersaas.ru
2003-2004 сс. оҕолорго уһуну ыстаныыга тириэньэр Б.Н. Ильин иитиллээччитэ Алеша Максимов (Мэҥэ Хаҥалас) 6,10 м көрдөрүүлээх бастаата, оттон үстэ төхтөрүйэн ыстаныыга иккис миэстэни ылла.
Алдан үөрэнээччитэ Владислав Дербенев (тириэньэрэ Л.Ю. Кисилева) үрдүгү ойууга үһүс буолла – 170 см.
2005-2006 сс. бөлөхтөрүгэр Таатта оҕото Данил Андросов (тириэньэрэ Е.И. Иванов) уһун ыстаныыга 5,05 м түһэн, үстэ төхтөрүйэн ыстаныыга 11, 15 м көрдөрүүлэнэн бастыҥ буолуталаата.
Күрэхтэһии иккис күнүгэр тириэньэр С.Е. Степанов иитиллээччитэ Ньургун Иванов (ДЮСШ-5) биэс биэрэстэҕэ спортивнай хаамыыга иннигэр кими да түһэрбэтэ. 300 м мэһэйдээх сүүрүүгэ Саша Лаврентьев (Алдан, тириэньэрэ А.А. Шаранов) үһүс көрдөрүүлэннэ – 51,15 сөк.
Саша уонна Нам оҕо спортивнай оскуолатыттан Радомир Бочкарев (тириэньэрэ К.М. Шелковникова) 400 м сүүрүүгэ бэрт кыранан бириистээх миэстэҕэ киирсибэтилэр. Манна уһуну ыстаныыга бэһис буолбут Игорь Скуратовы (ДЮСШ-1, тириэньэрэ П.А. Нечаев) бэлиэтэххэ сөп.
Роман Попов, edersaas.ru
Хаартыска Интэриниэттэн ылылынна.