Эдэр армеецтар сүлүөттэрэ ханна буолла?
Бүгүн “Арассыыйа – мин дойдум” устуоруйа пааркатыгар “Юнармия” Бүтүн Арассыыйатааҕы оҕо байыаннай-патриотическай” уопсастыбаннай хамсааһын өрөспүүбүлүкэтээҕи VII сүлүөттэрэ буолан ааста. Бу бэлиэ түгэн Саха АССР 100 сылыгар анаммыта дьоһун суолталаах.
Саха Өрөспүүбүлүкэтигэр 731 муниципальнай тэриллиигэ 186 патриотическай этэрээккэ 214 эдэр армеец баар. Кинилэртэн 63 оҕо “Юнармейская доблесть” үһүс истиэпэннээх түөскэ кэтиллэр бэлиэнэн наҕараадаламмыта. Бу сүлүөккэ Алдан, Амма, Бүлүү, Ленскэй, Мэҥэ Хаҥалас, Нам, Нерюнгри, Өлүөхүмэ, Таатта, Томпо, Уус Алдан, Уус Маайа, Хаҥалас, Чурапчы оройуоннарын, Дьокуускай куорат, Жатай, Дьокуускайдааҕы Кадеттар интэринээт-оскуолаларыттан кэлбиттэр.
Сүлүөтү үөрүүлээхтик арыйыыга Дьокуускай к. 10 №-дээх оскуолатын 9 армееһа Арассыыйа, Саха сирин, Юнармия уопсастыбаннай хамсааһын былаахтарын “Встречный марш” муусукаҕа доҕуһуоллатан күөрэччи көтөҕөн киирдилэр. Онтон хамаандалааччы эрэгийиэннээҕи штаб начаалынньыга Кузьмин А.Н. араапардаата. Начаалынньык араапары туппутун кэнниттэн эдэр армеецтар “Ураа!” хаһыылара мусуой саалатын ньиргиччи толордо.
Бэйэтин киирии тылыгар СӨ Бырабыыталыстыбатын бэрэссэдээтэлин солбуйааччы Сергей Местников өрөспүүбүлүкэҕэ патриотическай иитиигэ улахан суолта бэриллэрин бэлиэтээтэ. Бу сүлүөт үрдүк патриотическай иитиигэ туоһунан буоларын, өрөспүүбүлүкэ оҕолоро уонна ыччата патриотизм тыыныгар иитиллэллэригэр, чиэһинэй, эрэллээх, туруоруммут сыалларын ситиһэр буолалларыгар төһүү күүс буоларын эттэ. Уонна Саха сиригэр байыаннай-патриотическай иитиигэ кэлимсэ былаан ылыныллан, Үөрэх, ыччат министиэристибэлэринэн хамсатыылаах үлэ баран эрэрин ыйан туран, эдэр армеецтары саҥа үөрэх дьылынан эҕрдэлээтэ, Бырабыыталыстыба аатыттан ситиһиилэри баҕарда. Ыччат Миниистирэ Петр Шамаев эмиэ итинник хабааннаахтык эҕэрдэлээтэ.
Сүлүөккэ мустубутттар Дьокуускайдааҕы кадеттар интэринээт-оскуолаларыттан “Альфа” бөлөх кыттыытын биһирии көрдүлэр. Бу бөлөххө араас улуустартан бу оскуолаҕа үөрэнэр оҕолор бааллар. Холобур, Таатта Чөркөөҕүттэн Вырдылин Вадим, Хаҥаластан Христофоров Владимир уо.д.а. бэртээхэй бэлэмнээхтэрин көрдөрдүлэр.
Сүлүөккэ кытта кэлбит Хаҥалас улууһун Уулаах Аан орто оскуолатын “Мужество” байыаннай-патриотическай кулууптарын туһунан кылгастык кэпсиэҕи баҕарыллар. Бу кулууп 2003 с. тэриллиэҕиттэн (сал. Заморщиков П.Р.) элбэх оҕону патриотическай тыыҥҥа уһуйда. Кулуупка дьарыктаммыт оҕолор аармыйа кэккэтигэр бэркэ сулууспалаан кэлэллэр эбит. Үгүс оҕо ИДьМ, ЫБММ курдук структураларга үлэһит буолбуттар. “Итии туочукаҕа” сылдьыбыттар кытта бааллар. “Маннык кулууп оҕолор бэрээдэктээх, физическэй өттүнэн бэлэмнээх буолалларыгар туһалаах, өй-санаа өттүнэн ситэллэр-хотоллор, Ийэ дойдубутун көмүскээччи буолуохтаахпыт диэн иитиллэн тахсаллар”, — диир салайааччылара Павел Родионович.
Ол эрээри, бүгүҥҥү сүлүөт саамай долгутуулаах түгэнинэн Дьокуускай куорат 26 №-дээх орто оскуолатын 4 “Г” кылааһын үөрэнээччилэрэ Юнармия хамсааһынын кэккэтигэр киирбиттэрэ буолар. Необутов Айтал андаҕар этэн чаҕаарда. Оҕолор андаҕардарын кэнниттэн кинилэргэ киниискэлэри уонна значоктары туттардылар. Ити курдук 24 үөрэнээччи бу хамсааһыҥҥа чилиэнинэн киирдэ. Онон кэккэ хаҥаата.
Бэлэмнээтэ Женни Стрюкова
Хаартыскаҕа уонна видеоҕа ааптар түһэриитэ, усуута.