Өрүү мичээр аргыстаах эдэркээн учуутал Анна Иванова Уус Маайа улууһун Эдьээн нэһилиэгин олохтоохторун биир киэн туттар, маанылаах кийииппитинэн буолар.
Биир да култуурунай, спортивнай тэрээһин Анна Константиновната суох ааспат. Кини мэлдьи үлэ буоллун, күрэхтэһии буоллун, ыччат ортотугар сылдьар көхтөөх киһи.
Биһиги кийииппит 1982 сыллаахха ыам ыйын 4 күнүгэр Горнай улууһун Маҕараһын Кудаисовтар дьиэ кэргэннэригэр тоҕус оҕоттон сэттис оҕонон төрөөбүт. Дьоллоох дьиэ кэргэн оҕолоро түгэн көһүннэр эрэ өрүү бииргэ мустар үгэстээхтэр.
Кыыс оскуоланы, институту бүтэрэн баран, эдэр исписэлиис быһыытынан үлэтин 2004 сылтан Дмитрий Коркин аатынан спортивнай интэринээт-оскуолаттан саҕалаабыт. Онон учуутал уустук идэтигэр уһаарыллыыны аан бастаан онно ааспыт.
— Мин олус баай уопуттаах кэлэктиипкэ түбэһэн, элбэххэ үөрэммитим. Дуогабарым быһыытынан Нам улууһун Түбэтигэр барыахтаах этим да, тоҕо эрэ барбатаҕым. Онтон биир сыл Мииринэй куорат 7-с оскуолатыгар идэбинэн үлэлээбитим. Ити кэмҥэ бу оскуоланы Арассыыйа эстрадатын биллиилээх ырыаһыта Виктория Дайнеко үөрэнэн бүтэрбит кэмэ этэ. Эмиэ наһаа үчүгэй педкэлэктиипкэ, бэрт элбэх оҕо ортотугар үлэлээн ааспытым. Ол кэнниттэн Дьокуускай куоракка көһөн кэлэн, икки сыл 7-с оскуолаҕа, ол кэнниттэн «Родничок» оҕо уһуйааныгар биир сыл курдук физкултуура учууталынан үлэлээбитим, — диэн кэпсиир эдэр учуутал. Мин Анна Константиновна кэпсээнин истэ олорон: «Үлэлиир сиргин үгүстүк уларыппыт эбиккин дии, ити туох эрэ төрүөттээх этэ дуу?» — диэн ыйыттым.
— Хайдах эрэ суолум бэйэтэ арыллан иһэр курдуга. Баҕар, эдэр буолан эбитэ дуу, эбэтэр дьылҕам тардыыта эбитэ дуу… Эдьээн Ивановтарыгар кийиит буолан, 2009 с. кэлбитим. Түөрт уол оҕолонон, сүөһү ииттэн, ыал буолан олорбуппут быйыл муус устарга оруобуна уон сыла буолла,— диэн кэпсэтиибитин түмүктүүр эдэр ыал ийэтэ.
Элбэх оҕолоох ийэ диэтэххэ, биһиги кийииппит үҥкүүлээн, сүүрэн-көтөн, олох кыыс оҕо курдук.
Кини хаһааҥҥыттан ыла үҥкүүлүүрүн, оҕо сылдьан ханна хайдах дьарыктаммытын сэһэргэһээччим бу курдук кэпсээтэ:
— Дойдубар Маҕараска 9-с кылааска диэри үҥкүү куруһуогар дьарыктаммытым. Онтон куоракка көһөн баран, «Эрэл» диэн үҥкүү ансаамбылыгар үлэм кэнниттэн киэһэ 7 -8 чаастан 10 чааска диэри кэлэн дьарыктанарым, улам үҥкүүлүүр буолбутум. Саамай улахан кыттыым олоҥхону туруоруу этэ. Онно кыттааччынан талыллан, аллараа дойду абааһыларын үҥкүүтүн үҥкүүлэспитим уонна тоҕо эрэ түргэн тэтимнээҕин иһин буолуо, олус сөбүлээн табыллан үҥкүүлээбитим. Ити курдук араас тэрээһиннэргэ кыттан, ырыаһыттарга эмиэ үҥкүүлэһэр этим. Үҥкүүлүүрбүн олус сөбүлүүбүн.
Ити курдук, күн кэриэтэ чаҕылыйан мичээрдии сылдьар Эдьээн нэһилиэгин биир киэн туттар учууталын, көхтөөх кийииппитин, элбэх оҕолоох дьоллоох дьиэ кэргэн мааныылаах ийэтин Анна Иванованы Дьиэ кэргэн күнүнэн истиҥник эҕэрдэлиибит! «Бүгүҥҥүҥ курдук өрүү дьону-сэргэни бэйэҕэр тарда сырыт. Чугас дьонуҥ тапталларыгар угуттанан, уйгулаах байылыат олохтон«, — диэн уопсастыбаннай олоххо көхтөөх эдэр ийэ биир дойдулаахтара истиҥник алҕыыбыт.
Ирина ВИНОКУРОВА,
Уус Маайа улууһун Эдьээн нэһилиэгиттэн
«Саха сирэ» хаһыакка, edersaas.ru саайтка анаан.