РФ Доруобуйа харыстабылын министиэристибэтэ иһитиннэрбитинэн, Арассыыйа доруобуйатын харыстабылын систиэмэтэ эбисийээнэ уоспата биллэр түбэлтэтигэр мэдиссиинискэй көмөнү оҥорорго бэлэмнэр.
edersaas.ru
Уоспаттан сэрэтии дьаһалларыгар социальнай арыты (дистанцияны) уонна тус гигиенаны тутуһуу, тыынар уорганнары харыстыыр сириэстибэлэри туһаныы, дезинфекцияны ыытыы киирэллэр.
Дойдуга уоспа киирэр кутталын сэрэтэн, ыам ыйыттан ыарыыны сэрэтиигэ, булууга уонна эмтээһиҥҥэ мэдиссиинискэй үлэһиттэри үөрэтии саҕаламмыта.
РФ Доруобуйа харыстабылын министиэристибэтэ эрэгийиэннэргэ ыарыыны сэрэтэргэ, быһаарарга уонна эмтииргэ методическай ыйынньыктары ыыппыттара.
Саха сиринээҕи Роспотребнадзор управлениета өрөспүүбүлүкэҕэ эбисийээнэ уоспата кэлэр түгэнигэр үлэһиттэрин бэлэмниир.
Ол туһунан Роспотребнадзор салайааччыта Изабелла Самойлова:
«Эбисийээнэ уоспата сибикилээх ыарыһахтары быһаарарга уонна эмтииргэ аналлаах тиэмэҕэ сэминээрдэри ыыттыбыт. Онон, быраастарбыт бары бастакы түбэлтэ билиннэр эрэ сөптөөх дьайыыны оҥорорго бэлэмнэр», -– диэн иһитиннэрдэ.
Өскөтүн оннук сибикилээх ыарыһах баара билиннэҕинэ инфекция балыыһатыгар -– анал бокска сытыараллар. Инфекция салгынынан тарҕамматын курдук, боксалар туспа киирэр-тахсар ааннаахтар уонна шлюзтаахтар.
Надежда ЕГОРОВА, «Саха сирэ» хаһыат, edersaas.ru