Эпидемиологическай балаһыанньанан сибээстээн, быйыл үөрэххэ улахан уларыйыы таҕыста. Эксээмэннээх кылаастар, төрөппүттэр итинтэн ордук долгуйаллар.
Аан дойдуну ааҥнаабыт ыарыыттан сылтаан, ыраахтан олорон (дистанционно) үөрэммиттэрин иһин, син биир кылааска, учууталы уун-утары көрөн олорон үөрэниигэ тиийбэт. Онон төрөппүттэр долгуйаллара оруннаах. Оҕолор биир кэлим эксээмэҥҥэ (ЕГЭ), сүрүн судаарыстыбаннай эксээмэҥҥэ (ОГЭ) хаачыстыбалаахтык бэлэмнэнэллэрин туһугар, эбии үөрэхтээһин педагогтарын уоппускаларын сыҕарытан биэрэри толкуйдууллар. Ол оннугар сайынын эбии үөрэхтээһининэн хаачыстыбалаахтык дьарыктыахтарын сөп дииллэр.
“Бу РФ Үөрэҕириигэ министиэристибэтин эрэкэмэндээссийэтэ эрэ буолар. Оҕо интэриэһин көмүскүүр — эксээмэҥҥэ эрэ бэлэмнэммэккэ, сүрүн биридимиэттэргэ үөрэх дьылын ситиһиилээхтик түмүктүөхтэрэ. Оттон сайын ордук интэриэһиргээбит эбии үөрэхтээһин бырагырааматынан дьарыктаныахтарын сөп”, — диэн СӨ Үөрэҕин уонна наукатын министиэристибэтигэр иһитиннэрдилэр.
Эмиэ даҕаны сөптөөх толкуй эбит. Сайынын үгүс оҕо улахан дьарыга суох. Ким эрэ дэриэбинэҕэ барыа, ким эрэ лааҕырынан хааччыллыа, сорохтор сайыны быһа дьиэлэригэр сытыахтара. Ол оннугар, иллэҥ кэми баттаһа бэйэлэрин интэриэстэринэн куруһуоктарга сылдьыахтарын сөп. Ол эрээри, бу билиҥҥитэ сүбэ сурук (рекомендация) эрэ буолар. Туга, ханныга быһаарылла илик.
Людмила ПОПОВА, edersaas.ru