Сүрүн Тыа хаһаайыстыбата

Эбии көмө олохтоох бородууксуйа хаачыстыбатын уонна кээмэйин улаатыннарыаҕа

Саха сиригэр тыа хаһаайыстыбатыгар наука саҥа арыйыыларын олоххо киллэрии салҕанар. Онуоха эһиилгиттэн судаарыстыба бүддьүөтүттэн эбии үп көрүллүөҕэ.

edersaas.ru

Эбии көмө олохтоох бородууксуйа хаачыстыбатын уонна кээмэйин улаатыннарыаҕа.
Ити туһунан өрөспүүбүлүкэ премьерэ Андрей Тарасенко салаа бэрэстэбиитэллэрин кытары мунньах түмүгүнэн иһитиннэрдэ.
СӨ Ил Дархана Айсен Николаев эрдэ бэлиэтээн эппитинэн, тыа хаһаайыстыбата -– дьон бэйэтин хааччынар уонна өрөспүүбүлүкэҕэ бородуукта тиийбэт куттала үөскээбэтигэр кыаҕы биэрэр салаа.
«Өрөспүүбүлүкэ баһылыгын сорудаҕынан биһиги тыа хаһаайыстыбатын өйөөһүн саҥа дьаһалларын толкуйдуубут. Үүннэрэн улаатыннарар эрэ буолбакка, бородууксуйаны переработкалыыр туһугар салааны саҥа таһымҥа таһаарыахха наада. Онуоха наукаҕа тирэҕирэн сайдыахха наада. Бу агропромышленнай комплекс айылҕа-килиимэт уустук усулуобуйатыгар салгыы сайдарыгар, оттон олохтоох оҥорон таһаарааччыларга оҥорон таһаарыыны уонна дохуоту элбэтэллэригэр көмөлөһүөҕэ», -– диэтэ Андрей Тарасенко.
СӨ Тыа хаһаайыстыбатын министиэристибэтигэр чопчулаабыттарынан, 2019 сылтан наука саҥа арыйыыларын олоххо киллэрэргэ тыа хаһаайыстыбатыгар сыл аайы 19-23 мөлүйүөннээх үп бэриллэрэ. 2022 сылга үп көрүллүбэтэҕэ. Онон, наука арыйыыларын үбүлээһини 30 мөлүйүөҥҥэ тиийэ улаатыннарарга  уонна үбү 2023 сылга көрөргө этилиннэ.
Тустаах этиилэри 2023 сылга уонна 2024-2025 сылларга судаарыстыба бүддьүөтүн туһунан өрөспүүбүлүкэ сокуонун барылыгар киллэриэхтэрэ. Кэнники үс сылга судаарыстыба өйөбүлүнэн өрөспүүбүлүкэ тэрилтэлэрэ кэккэ наука арыйыыларын олоххо киллэрдилэр. Олор ортолоругар — кымыһы уратытык көөнньөрүү. Саҥа арыйыы кымыһы оҥорорго эрэ буолбакка, бырамыысыланнай переработкалыыр тэрилтэлэргэ уонна дьоҕус бааһынай-пиэримэр хаһаайыстыбаларыгар аһытыллыбыт үүт бородуукталарын оҥорорго туһаныллыан сөп.

Надежда ЕГОРОВА, «Саха сирэ» хаһыат, edersaas.ru

0
0
Telegram Whatsapp