Дьаҥы утары охсуһар өрөспүүбүлүкэтээҕи суһал ыстаап салайааччытын солбуйааччы Ольга Балабкина бүгүн иһитиннэрбитинэн, ааспыт сууккаҕа 94 киһи коронавирус дьаҥар хаптарбыт.
Уопсайынан ыллахха, Арассыыйа да үрдүнэн ыалдьар киһи ахсаана эбиллибит. Дьэ, онон Саха сиригэр ааспыт сууккаҕа төһө киһи ыалдьыбытый — 94. Ол курдук, киин куораппытыгар – 55, Мэҥэ Хаҥаласка- 8, Алдаҥҥа, Мииринэйгэ – 5-тыы, Үөһээ Бүлүүгэ, Ньурбаҕа, Чурапчыга – 4-түү, Дьааҥыга, Хаҥаласка – үстүү киһи хаптарбыт. Ону таһынан Өймөкөөҥҥө – икки, Өлүөхүмэҕэ – биир киһи ыалдьыбыттар. Сыыппара итинник.
Ыалдьыбыт дьону кытта хантаактаах дьону булбуттар, амбулаторнай эмтээһин саҕаламмыт. Ольга Валерьевна этэринэн, бу ыарыы үксүн ыаллары хаарыйбыт. Дьиэ кэргэҥҥэ биир эмэ киһи ыарыйда да, бу ыал сутулларыгар төрүөт буолар. Ыстаап салайааччытын солбуйааччы сүрүн болҕомтону компьютернай томографияҕа анаата. Бу тэрилинэн Дьокуускайга 349 чинчийиини ыыппыттар. КТ уочараты таһаарбат туһуттан бу тэрили эбии туруорбуттар. Маны сэргэ, быраастар ахсааннарын эмиэ эппиттэр. Ити барыта дьон тоҕуоруһуутун таһаарбат туһуттан оҥоһуллара чахчы. “Ол эрээри КТ-га быраас анааһынынан уонна ыарыы килиниичэскэй сибикилэрэ билиннэҕинэ түһүөхтээххитин таба өйдүөхтээххит”, — диэтэ О.Балабкина.
Итиэннэ Саха сиригэр бу ааспыт субуотаҕа уонна өрөбүлгэ элбэх тест оҥоһуллубутун эттэ.
Ольга Валерьевна иһитиннэрбитинэн, СӨ Ил Дархана улуустааҕы ыарыыны бохсууга үлэлиир ыстааптар үлэлэрин сүрүннүөххэ наадатын бэлиэтээбит. Дьон мааскалаах сылдьалларын, тэйиччи туттан сылдьыыны тутуһалларыгар эттэ.
“Билигин ковиды утары хайдах туруулаһары биллибит. Мэлдьи хаппахчылана, сабыылаах олорор кыахпыт суох , онон аныгы кэм туруорбут усулуобуйатыгар олоро үөрэниэҕиҥ”, — диэн түмүктээтэ бүгүҥҥү брифинин О.Балабкина.
Женни Стрюкова.
Хаартыскаҕа: О.Балабкина