Кураан сайын буолбутунан, сүөһүгэ эбии аһылыгы тэрийиэххэ наада.
Хомуһу баайыы
Урут, мин аҕам холкуоска биригэдьиирдиир эрдэҕинэ, күһүөрү сайын от үлэтин үмүрүйүүтэ оҕонньотторунан хомус баайтарар идэлээх этэ. Кырдьаҕастар күөлгэ тыынан уста сылдьан, хомуһу сиппиир саҕа гына бобо баайан кэбиһэллэрэ. Күһүн, муус киһини үчүгэйдик уйар буолбутун кэннэ, турбутунан көҕөрө куурбут хомуһу хотуурунан ходуйан ылан, пиэрмэҕэ тиэйэллэрэ. Бу хомуһу бэлэмнээһин бастакы ньымата.
Иккис ньыма: хомуһу эмиэ ити үөһэ эппитим курдук баайан баран, атынан тоҕу тартаран кытылга таһаараллара уонна тута дробилкаҕа тиэйэллэрэ. Куурдан, мэлийэн баран, сүөһүгэ сиэтэллэрэ. Сүөһүлэр мууска киирэн ууга былдьаппаттарын туһугар хомустаах күөлү күрүөлээн кэбиһэр этилэр.
Былаҕы бэлэмнээһин
Холкуос, сопхуос саҕана былаҕы быһан, баайан, куурдан баран эмиэ дробилкаҕа мэлийэрбит. Билигин талах ньирээйи лабааларын быһан түрбэлии баайталаан, күн көрбөт сиригэр ыйаан куурдуохха сөп. Маннык былаҕы сүөһү олус минньигэһиргээн сиэҕэ. Кураан дьылга бэртээхэй эбиилик буолуоҕа.
Өлүөхүмэттэн Александр Филиппов, «Саха сирэ», edersaas.ru сайтка анаан.