Маны аах Уопсастыба

Эбээн Бытантайга — стратегия сиэссийэтэ

«Инникини тутуу» («Индустрия будущего») кэмиэрчэскэйэ суох автономнай тэрилтэ салайааччыта Иван Степанов бу күннэргэ Эбээн Бытантай улууһугар икки күннээх стратегия сиэссийэтин ыытан кэллэ.

Эдэр салайааччы сырыытын туһунан бу курдук кэпсээтэ: «Мин төрдүм — Саккырыыр. Эһэм Иван Степанов бу улууска баһылыгынан үлэлээбитэ.


Икки күн иһигэр Саккырыырга тиийэн, олохтоохтор кэскиллээх былааннарын кытта билистим. Тэрилтэбит нэһилиэк саҥа киэбин оҥорууга үлэлэһэр буолан, хоту дойдуга киин улуустары кытта тэҥнээн көрүүгэ бэртээхэй сырыы буолла. Маннык көрүҥүнэн үлэ олохтоохтору да, биһигини да сонун сүүрээннэри, тосхолу буларга, кэккэ хайысхалары тобулууга суолбутун арыйан-көрдөрөн биэрэр.


Эбээн Бытантай улууһа национальнай улуус эрээри, манна эбээн тыла сүтүөн сөптөөх кыһалҕата сытыытык турар эбит. Эбээннии билэр, саҥарар киһи суоҕун тэҥэ. Бэйэтин тылын билэр эрэ норуот эстибэт кэскиллээх. Стратегия сиэссийэтигэр бу тирээн турар боппуруос тула кэпсэттибит.

Кыттааччылартан үгүс этии киирдэ: эбээн тылын үөрэтиигэ мобильнай сыһыарыылары уонна тылбаасчыттары оҥоруу уонна ону туттуу; оскуолаҕа киириэн иннинээҕи саастаах оҕолорго эбээн тылын үөрэтии; улахан дьоҥҥо тылы үөрэтии.

Маныаха ыччаты сыһыаран, үлэни тэрийэр сорук турар. Стратегия сиэссийэтигэр сүрүннээн эбээн тылын билиигэ уонна үөрэтиигэ болҕомтобутун уурдубут».

Ити курдук, улуустарынан сылдьан, «Инникини тутуу» («Индустрия будущего») кэмиэрчэскэйэ суох автономнай тэрилтэ нэһилиэктэргэ сайдыы саҥа саҕахтарын арыйар.

Елена ПОТОЦКАЯ, «Саха сирэ» хаһыат, edersaas.ru

0
0