Эбээн-Бытантай оройуонугар килиип усталлар.
Баатаҕай Алыытыттан «Кындыкаан» айар бөлөх эспэдииссийэттэн кэллэ. Бу сырыыга Субудай Айыы-Арчылаан Дьулустаан Уола — Kit Jah ырыатыгар саҥа килииби устубуттар.
«Айаммыт сыалынан Kit Jah ырыатыгар виеоролик устуута буолла. Үчүгэй каадырдар оҥоһулуннулар. Хотугу дойду аҕыйах ахсааннаах төрүт олохтоохторо — эбээннэр хайдах олороллорун уу харахпытынан көрдүбүт», — диэн ырыаһыт Евгений Артахинов – MOSKILA этэр.
Эспэдьииссийэ хамаандатыгар хаартыскаҕа түһэрээччи Сергей Шарин, оператор Михаил Михайлюк, быраап боппуруостарыгар координатор Ксения Копырина бааллар. Бырайыак иитинэн хамаанда кыттыылаахтара хотугу аҕыйах ахсааннаах төрүт олохтоох норуоттар олорор сирдэригэр музыка, хартыына айаллар, хаартыскаҕа түһэрэллэр. Ону сэргэ видеонан оонньууга, мульткиинэҕэ, остуоруйаҕа үлэлэһэллэр. Бырайыакка айар дьоҕурдаахтар, уопсастыбанньыктар кыттыһаллара элбээн иһэр. Айаҥҥа «Полярные авиалинии» авиахампаанньа, «Якутия» ФАПК, «Сибойл» хампаанньа көмөлөспүттэр.
Эспэдииссийэ кыттыылаахтарын сүрүн соругунан хотугу норуоттары түмэн персонаж оҥоруутугар үлэлэһии, ону сэргэ кинилэр кыһалҕаларыгар болҕомтону ууруу.
Санатан эттэххэ, «Кындыкаан» айар бөлөх кыттыылаахтара былырыын күһүн Томпоҕо эбээннэр тохтоон олорор сирдэригэр сылдьан матырыйааллары хомуйбуттар, бырайыактары бэлэмнээбиттэр. Айаҥҥа сылдьан хомуйбут үлэлэрэ уонна матырыйааллара «Кындыкаан» арт бэстибээл сүрүн үлэлэринэн буолбуттар.
+1
+1
+1
+1
+1
+1
+1