Тас дойдулар сааҥсыйа биллэриэхтэриттэн, билигин ас-үөл, табаар сыаната биллэ үрдээтэ.
Ааспыкка биһиги суруналыыстарбыт Аллараа Бэстээх, Дьокуускай кууһунан атыылыыр базаларыгар сылдьан сыана хайдаҕын көрөн-истэн сырдаппыттара. Оттон хоту улуустарга сыана хайдаҕый? Бүгүн биһиги Эбээн Бытантай улууһун Дьарҕаалаах нэһилиэгэр сибээскэ тахсан, баһылык эбээһинэһин быстах кэмҥэ толорооччу Евгений Ивановтуун кэпсэттибит:
— Ааспыт баскыһыанньаҕа «Якутоптторг” тэрилтэ нөҥүө улууспут логистическай киинигэр саамай наадалаах бородуукталар кыһыҥҥы суолунан атыыга кэлбиттэрэ. Ол эрээри сыана чуолкайданыар диэри билигин атыыга тахса илик. Билиҥҥи туругунан нэһилиэкпитигэр былырыыҥҥы саппаас аспыт атыыга баар. Нэһилиэкпитигэр “ИП Баишева” маҕаһыыныгар билигин саахар киилэтэ – 80 солкуобайга, гречка – 94 солкуобайга, бурдук – 44 солкуобайга, үүнээйи арыыта – 183 солкуобайга турар. Ону сэргэ, ити “Якутоптторг” тэрилтэ филиала биһиэхэ улууспутугар аһыллыаҕыттан, ас-үөл, наадалаах бородуукта дэлэй, сыаната да удамыр, — диэн санаатын үллэһиннэ.
Ульяна Захарова.
Дьарҕаалаах нэһилиэгин хаартыскалара туһанылыннылар.