Маны аах Уопсастыба

Эбээн Бытантай Дьарҕаалааҕар күөх рейс аһылыгын хайдах түҥэттилэр?

Бу күннэргэ батсаап ситимигэр Эбээн Бытантай Дьарҕаалааҕар күөх рейс кэлбитин туһунан хаартыска социальнай ситимнэри толордо. Онно оҕуруот аһын уонна фруктаны үллэстибиттэрин туһунан суруйбуттар.

Биһиги Дьарҕаалаах баһылыгар Лев Вячеславович Гороховка быһа сибээскэ таҕыстыбыт:

— Биһиги Дьарҕаалаахпыт нэһилиэгэр 226 киһи олорор. Атырдьах ыйын кэнниттэн күөх рейс бу иккис сырыыта буолар. Күөх рейс сылга түөртэ кэлэр. Бэлиэтээн эттэххэ, быйыл биһиэхэ 25 сыл кэнниттэн АН-2 самолет дьэ көтөн кэллэ. Бу көтөн кэлэригэр туоннаттан тахса хортуосканы уонна фрукта, оҕуруот аһын көрүҥнэриттэн аҕалла. Рейс Уус Куйгаттан кэллэ. Онно «Якутоптторг» тэрилтэ атыы-эргиэн логистическэй киинэ тутуллубута. Инньэ гынан туох баар оҕуруот аһа, фрукта барыта чэпчэки сыаналаах кэллэ.

Ол курдук, хортуоппуй киилэтэ — 74 солкуобай, виноград – 245 солкуобай, чеснок – 390 солкуобай, 30 устуука сымыыт – 360 солкуобай. Онон 12 киилэ хортуосканы биир ыалга, оттон фрукта аҕыйах кэлбитинэн, биир да киһи маппакка амсайдын диэн барыларыгар тэҥҥэ үллэрбиппит. Бэйэбит атыыһыттарбытыгар, холобур, сымыыт 800-1200 cолкуобайга тиийэ үрдүүр.

Улууспут баһылыга икки кытыы нэһилиэктэргэ сүүрбэлии туонналаах тымнытар систиэмэлээх рефрижераторы туттарбыта. Онон кууруссабыт, сибиинньэбит этэ, бурдукпут, саахарбыт билигин элбэх, икки сыллааҕы хаһааспыт баар диэххэ сөп.

Дьиҥ балаһыанньаны билбэккэ сылдьан дьон социальнай ситимнэргэ итинник хаартысканы тарҕатара соччото суох, биһиги нэһилиэкпит дьонугар кэлбит аһы-үөлү барытын тэҥинэн кими да матарбакка үллэрэбит. Билигин да өссө икки рейс кэлэрэ былааннанар. Оттон «Якутопттор»” тэрилтэ биһигини абыраан олорор диэн этиэхпин баҕарабын.

Ульяна ЗАХАРОВА.

Хаартыскалар Дьарҕаалаах нэһилиэгин дьаһалтатын тус архыыбыттан туһанылыннылар.

3
0