Арктика дьыаларыгар Судаарыстыбаннай кэмитиэт үгэс буолбут хотугу төрүт салааларга отделын исписэлииһэ Иннокентий Слепцов Эбээн Бытантай национальнай улууһугар хараалы тэрийиигэ көмөлөһөн кэллэ.
edersaas.ru
Бу улууска табаны иитиигэ икки бөдөҥ хаһаайыстыба үлэлиир: «Арктика» тыа хаһаайыстыбатын производственнай кэпэрэтиибэ уонна «Ленинскэй» муниципальнай унитарнай тэрилтэ.
Хараалга табаһыттар ыстаада табаларын мунньан аахтылар, аналларынан уонна саастарынан наардаатылар, бэтэринээрдэр эмтиир-сэрэтэр үлэни тэрийдилэр, исписэлиистэр төрүөҕү ылыы уонна табаны чөл тутуу көрдөрүүлэрин түмэннэр, сыллааҕы үлэ барыллаан түмүгүн таһаардылар, салааны сайыннарыы тирээн боппуруостарыгар сүбэ мунньахтары ыыттылар.
Ардай аһыылаах кыыллары, бөрөлөрү утары үлэ тумнуллубата. Экология министиэристибэтин Биология ресурсаларыгар департаменынан көҥүллэммит инструкцияҕа олоҕуран, «Римифоннаах гранула» диэн бэтэринээринэй препараты хайдах быһыылаахтык туһанарга табаһыттарга сүбэлэр бэрилиннилэр. Ону таһынан, бөрө ахсаанын хонтуруолга тутарга биэдэмистибэлэр икки ардыларынааҕы бииргэ үлэлээһин чэрчитинэн, хаһаайыстыбалар анал тэриллэринэн хааччылыннылар.
Раиса Сибирякова, «Саха сирэ» хаһыат, edersaas.ru