Орто Халыма улууһун Эбээх нэһилиэгин олохтоохторо ытык кырдьаҕастарыгар ураты болҕомтону ууралларынан биллэллэр.
Бу туһунан «Эдэр саас» уопсастыбаннай кэрэспэдьиэнэ Людмила Никитина өрүү сырдатар.
Бу күннэргэ улуустарга биэнсийэни түҥэтии буола турар. Онно кырдьаҕастарга эппиэттээх үлэһиттэр бэлэхтээх тиийбиттэрин туһунан биһиги кэрэспэдьиэммитигэр тыыл бэтэрээнэ Матрена Слепцова үөрэ-көтө кэпсээтэ:
«Биһиги көлүөнэ дьон Улуу Кыайыы 75 үбүлүөйүн күн-түүн чугаһаан истэҕин аайы, сэрии иэдээнин илэ харахпытынан көрбүт буолан, бу күнү долгуйа күүтэбит. Ону тэҥэ нэһилиэк бары олохтоохторо — улаханыттан оҕотугар тиийэ, биһиэхэ, кырдьаҕастарга, ураты болҕомтолоро биһигини үөрдэр, санаабытын көтөҕөр.
Бу күннэргэ ветпуун сэбиэдиссэйэ Евдокия Слепцова тыыл бэтэрээннэригэр бырааһынньык остуолун мааны аһын торт оҥорон бэлэхтээтэ.
Ону тэҥэ почтабыт начальнига Екатерина Богатырева биэнсийэни дьиэнэн тарҕата сылдьан, кырдьаҕастарга хоруоҥканан тиһиллибит «Георгиевскай лиэнта» брошка оҥорон, түөспүтүгэр кэтэрдэн олус диэн үөртүлэр.
Аан дойдуну аймаабыт сыстыганнаах дьаҥ кэмигэр кырдьаҕас дьон дьиэттэн тахсыбакка олордохпутуна, маннык соһуччу кэһиилээх кэлэн, биир дойдулаахтарбыт санаабытын көтөҕөллөрө олус долгутуулаах.
Үтүө санаалаах дьоммор махтал тылларын аныыбын уонна Ийэ айылҕаттан бу сыстыганнаах дьаҥ этэҥҥэ ааһарыгар көрдөһөбүн».
Елена ПОТОЦКАЯ, «Саха сирэ»» хаһыат, edersaas.ru