Уопсастыба

Эбээхтэр чөл олоҕу уруйдууллар

Орто Халыма улууһугар Эбээххэ Саха АССР  тэриллибитэ 100 сылыгар анаммыт тэрээһиннэргэ олохтоохтор көхтөөхтүк кытталлар.  

Бу туһунан биһиги уопсастыбаннай кэрэспэдьиэммит Людмила Никитина маннык сырдатар:

Киин улуустарга төһө да ириэрдэр, Халымаҕа хаар ууллуо ыраах. Онон бу күннэргэ  Андылаах күөлгэ оҥоһуллубут катокка тэрилтэлэр икки ардыларыгар күрэхтэһиилэр  буоллулар. 
 «Хаҥалас күүстээхтэрэ» диэн тэрээһиҥҥэ  Николай Созонов 1-Ньонньооһой, Николай Слепцов-Кустук уонна Николай Гуляев- Күүстээх Ньукаас ааттарын үйэтитэргэ аналлаах 6-с төгүлүн улуустааҕы мас тырдыһыыта  Орто-Халыма куоракка»Родина» спорткомплекска буолан ааста.  Күрэскэ 9  хамаандаҕа 96 киһи кыттыыны ылла. Абсолютнай күрэскэ 1-кы Мээтистэн сылдьар бииргэ төрөөбүттэр Юра Саввинов 75 киилэттэн үөһээ уонна быраата Родион Васильев 75 киилэҕэ диэри кыайыы өрөгөйүн билэн, «Бураан»  двигателин туттулар. Кэрэ аҥардарга Эбээхтэн Ольга Гуляева иннин кимиэхэ да биэрбэккэ электроскутерынан наҕараадаланна. Хамаанданан түмүккэ Сылгы Ыытар бастаата. Иккис Өлөөкө Күөл, үһүс миэстэни куорат хамаандата ыллылар. Бириистэри олохтоох дьаһалта, үлэлиир тэрилтэлэр уонна күүстээхтэр аймахтара, оҕолоро туруордулар.

Маны таһынан,  «Доруобай нэһилиэк» сонун бырайыагы олоххо киллэриибит бэлиэтинэн  уонна бастакы хардыытынан 50+ саастаахтар уопсастыбаларын салайааччыта Северина Жиркова көҕүлээһининэн нэһилиэк олохтоохторугар хаамыы тэрээһинэ буолла. 58 киһи кыттыыны ылан,  кэлээскэлээх ийэлэр оҕолорун сиэппитинэн нэһилиэккэ киири стелаҕа диэри  хааман кэллилэр. Оттон нэһилиэктэн  2,2 км сытар Мэхээ күөлүгэр диэри 38 киһи хааман тиийэн, 100 сыыппара оҥорон, кулууп үлэһиттэрин көмөтүнэн флешмоб үҥкүүлээтилэр. Манна 75 саастаах  Владимир Слепцов, 70-нарын ааспыт   Петр ЖирковУльяна Гуляева, саамай кыралара — 4 саастаах уһуйаан иитилээччилэрэ Ньургуйаана Винокурова, Мичийэ Ушакова кыттан, дьон санааларын көнньүөртүлэр.  Онон бары хаамааччылар  уопсайа 252 км хаамыыны оҥордулар.

Саха АССР тэриллибитэ 100 сылын эбээхтэр ити курдук чөл олоҕу айхаллаан бэлиэтээтилэр.

 

 

Елена ПОТОЦКАЯ, “Саха сирэ” хаһыат, edersaas.ru

0
0
Telegram @edersaas20