Уопсастыба

Эбээххэ дьиэлэр саҥардыллаллар

Орто Халыма улууһун Эбээх сэлиэнньэтин олохтоохторун сүрүн дьарыктара — сылгы, ынах иитиитэ, кыһын — балыктааһын.

edersaas.ru

Нэһилиэк олоҕун-дьаһаҕын туһунан уопсастыбаннай кэрэспэдьиэн Людмила Никитина кэпсиир:

— Эбээххэ 487 киһи олорор. Быйылгы сылга нэһилиэкпитигэр 18 ыал 268 сылгыны (онтон биэтэ — 111 төбө), 124 ынах сүөһүнү (ыанар ынаҕа — 47 төбө) ииттэн олорор.

Бу саас «Мин уһаайбам» диэн саҥа муниципальнай бырагыраама чэрчитинэн  олохтоох дьаһалта баһылыга Юрий Гуляев нэһилиэк олохтоохторун сайаапкаларынан Дьокуускайтан тутуу матырыйаалын аҕалан, чааһынай ыаллар түннүктэрин, кырыыһаларын уларыттылар.


Ыал үксэ дьиэлэрин араас өҥнөөх тимир лииһинэн саҥардан, нэһилиэкпит киһи билбэт буола тубуста.

Нэһилиэкпит олох саҥатыгар түспүтүгэр, киэркэйбитигэр олохтоох дьаһалта  баһылыгар махталбыт муҥура суох. 

Быйыл улууспутугар үүт аһы астаан таһаарар тэрилтэ эстэн (моҥкурууттаан), нэһилиэк аайы туспа үүт тутар кэпэрэтииптэр тэрилиннилэр. Биһиги нэһилиэккэ «Арчы» кэпэрэтииби  Владимир Слепцов тэрийэн, үүппүтүн киниэхэ туттара сылдьабыт. Үүт төлөбүрэ кэпэрэтиипкэ — 10 солк., улуус бүддьүөтүттэн — 15 солк. өйөнөн, уопсайа биир киилэҕэ — 25 солк. төлөнөр. Үүт сыаҕын хаһыс да сылын Варвара Слепцова кыыһынаан, Чурапчытааҕы физкультура  уонна спорт институтун устудьуона  Роксаналыын күн аайы 300 киилэ үүтү эрийэн, үрүҥ аһы  астыыллар. Маны таһынан, ыанар ынах төбөтүгэр 30 тыһыынча солкуобай субсидия көрүллэр. Сыл аҥаардааҕы төлөммүтэ. Онтон хаалбытын бу күннэргэ күүтэбит. Оччоҕо окко киириигэ тирэх буолуо этэ. 

Бэс ыйын ортото этиҥтэн барбыт тыа баһаара хас эмэ көстөөх сири, сылгы баазатын, биирдиилээн балыксыттар, булчуттар дьиэлэрин былдьаата.

Аны оттуур ходуһаларга, нэһилиэккэ чугаһыыр куттала баар буолан, бэс ыйын 24 күнүттэн улуустааҕы баһаарынай хамаанда уонна нэһилиэк эр дьоно уоту кытта охсуһаллар, субуотунньуктууллар.

Уопсайа үстэ субуотунньуктаатылар.  Ыарахан уйуктаах тиэхиньикэ суох буолан, кыһалҕа үгүс. Сүүрбэччэ сыллааҕыта  олохтоох дьаһалта ылбыт ДТ тыраахтара өрөмүөн күүһүнэн эрэ үлэлиир.  

Бу күннэргэ эбээхтэр окко таҕыстылар. Быйылгы былааннарынан 700 тонна оту оттоотохторуна, кыстыгы этэҥҥэ туоруохтарын сөп.

Елена ПОТОЦКАЯ, «Саха сирэ» хаһыат, edersaas.ru

Хаартыска: Людмила Никитина тиксэриитэ.

0
0

Добавить комментарий