Эбээх олохтоохторо ойуур баһаарын бохсоллор
Олох-дьаһах

Эбээх олохтоохторо ойуур баһаарын бохсоллор

Өрөспүүбүлүкэ үрдүнэн 29 ойуур баһаарын умуруорууга үлэ бара турар. Уот 1 515,50 га иэннээх сири сиэтэ.

edersaas.ru

Орто Халыма улууһун Эбээх сэлиэнньэтин олохтооҕо Ульяна Гуляева уһук хотугу сиргэ турбут ойуур баһаарын туһунан маннык кэпсиир:

— Ыксаллаах балаһыанньаҕа олоробут. Холкутук утуйуу-олоруу диэни умуннубут. Сир-дойду уокка былдьанна. Саатар  курааннаан, чугаһынан уу да суох. Күөллэр кууран-хатан хааллылар. Ойуур уокка былдьанан бүттэ. Тыаттан бултаммат дьон буоллубут. Ходуһаны эмиэ уот ылла. Оттонорго уустук балаһынньа үөскээтэ. Онон сүөһү да тутар ыарахан буолла. 

Билигин  32 кыраадыс куйаас. Баһаар өссө сүрдэннэ. Буруоттан сылтаан оннооҕор тиэргэммит үүнээйитэ кытта кэхтэн эрэр. Тэпилииссэни астахха, үүнээйи барыта буруонан бүрүллэн турар. Таһырдьа киһи кыайан тыыммат буруота. Күөмэй, харах аһыйар.

Күммүт кытаран, банаар уотун курдук тыгар.  Ыаллыы сытар нэһилиэккэ көмөҕө эбии дьону аҕалбыттар үһү.  Биһиги дьоммут баһаары бохсор субуотунньукка бэйэлэрэ сылдьаллар. Нэһилиэк дьонун кыаллар өттө — бары баһаары утары үлэҕэ. Күтүөтүм уонна кыыһым бэҕэһээ сарсыарда барбыттара, кэлэ иликтэр. 

Бу күннэргэ ойуур баһаара Халыма-Индигиир улуустарыгар улаханнык турда. Хоту дойду дьоно кэлэр нэдиэлэттэн халлаан сөрүүкээтэҕинэ, баһаар арыый тохтуура буоллар диэн баҕалаахтар.

Елена ПОТОЦКАЯ, «Cаха сирэ» хаһыат, edersaas.ru

Хаартыска: Ульяна Гуляева тиксэриитэ

 

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

1 + 20 =