Орто Халыма улууһун Эбээх нэһилиэгин ытык кырдьаҕастара, тыыл бэтэрээннэрэ «быйыл биһиги наһаа да абыранныбыт!» дэһэллэр.
edersaas.ru
Ол туохтан абыраммыттарын туһунан тыыл бэтэрээнэ Матрена Слепцова маннык кэпсиир:
— Дьиҥэр быйыл эрэ буолбакка, биһиги нэһилиэкпитигэр кырдьаҕастарга былыргыттан ураты истиҥ сыһыаннаахтар. Ол үтүө үгэс быһыытынан көлүөнэттэн көлүөнэҕэ бэриллэн иһэр. Сыл аайы ыччаттар, эр дьон кырдьаҕастарга муус ылан, тиэйэн биэрэллэр.
Быйыл, Улуу Кыайыы 75 сылынан, биһиги ордук ураты болҕомтонон туһанабыт. Ол курдук, Орто Халыма куоракка олорор биир дойдулаахпыт Владимир Жирков сип-сибиэһэй сыаҥааны (сыалыһар) ыытан үөртэ. Биир үтүө күн Эбээх орто оскуолатын 3-с кылааһын үөрэнээччилэрэ учууталлара Марианна Гуляеваны кытта бэйэлэрэ туһахтаан бултаабыт хабдьыларынан күндүлээбиттэрэ. Бу биһиги, кырдьаҕас дьон, маанылаах аспыт буоллаҕа. Онон кырачааннарбыт олуһун да үөрдүбүттэрэ!
Онтон бу аан дойдуну аймаабыт сыстыганнаах дьаҥ кэмигэр дьиэттэн тахсыбакка олордохпутуна, оскуола кэлэктиибэ — «Битэмииннээх бакыат», оҕо уһуйаанын кэлэктиибэ — муус, оттон нэһилиэкпит сүөһүлээх ыаллара үрүҥ ас илгэтин арааһын түҥэтэн, олус да үөрдүбүт.
Онон нэһилиэкпит олохтоохторо, кэнчээри ыччаппыт биһиэхэ болҕомтолорун ууран, күннэтэ бүөбэйдии, сылаас сыһыаны бэлэхтии олороллор, — диэн Матрена Николаевна үөрүүтүн үллэһиннэ.
Орто Халыма Эбээх нэһилиэгин сонуннарын кэлиҥҥи кэмҥэ «Эдэр саас» саайт нөҥүө өрөспүүбүлүкэ бүттүүнэ ааҕа, билэ олорор. Маныаха хаһыат уопсастыбаннай кэрэспэдьиэнэ Людмила Никитина көмөтө сүҥкэн. Кини сотору-сотору бэрт интэриэһинэй сонуннары тиһэн ыытар буолан, кыракый Эбээх олоҕун-дьаһаҕын сонуна өрөспүүбүлүкэни тилийэ көтөр. Бу тыыл бэтэрээнэ Матрена Слепцованы кытта эмиэ Людмила Никитина сибээстээтэ.
Эбээх нэһилэгин дьоно-сэргэтэ дьиэттэн тахсыбакка олорор тыыл бэтэрээннэригэр эдэрдиин-эмэнниин болҕомтолорун туһаайан өйүү, көмөлөһө олорллоро — бастыҥ холобур!
Елена ПОТОЦКАЯ, «Саха сирэ» хаһыат, edersaas.ru