Остуоруйа былыр былыргыттан саха мындыр, киэҥ өйүн-санаатын, олоххо сырдык ыратын кэрэһитэ буолар. Эбээ Маайа диэн аатынан «ютуб» саайтка остуоруйалары наҕыл, холку куолаһынан ааҕарын үгүс киһи сэргээн истэр. Ханаал номнуо 1600-тэн тахса сурутааччылаах.
Бүгүн СӨ үтүөлээх артыыската, Ньурба тыйаатырын артыыһа Майя Петровна Слепцовалыын-Эбээ Маайалыын кэпсэттибит:
— Мин Чурапчы улууһуттан төрүттээхпин. 80-с сылтан Ньурба тыйаатырыгар үлэлиибин. Икки оҕолоохпун. Арыый отуппун ааһан баран ыал буолбут буоламмын, сиэннэрим кыралар. Былырыын, 2019 сылга, оруобуна Тыйаатыр сылыгар икки оҕом иккиэн сиэн бэлэхтээбиттэрэ.
Дьэ, мин кырачаан сиэннэрбэр куруук остуоруйалыыр буоламмын, ардыгар гостуруолга баран хааллахпына, оҕолорум барахсаттар миигин суохтаан олус ахталларын кыыһым Маргарита кэпсээбитэ уонна: «Ийээ, эн батсаапка аудионан остуоруйалаан ыыт, эн куоласкын истэн ахтылҕаннара ааһыаҕа», — диэбитэ. Мин оннук ыытар буола сырыппытым.
Арай биирдэ гостуруоллаан кэлбитим, кыыһым Маргарита, кини идэтинэн режиссер, остуоруйаларбын ютубка ханаал аһан угар туһунан идиэйэ көтөхтө. Мин бастаан наһаа кыбыстыбытым. Ол да буоллар сөбүлэспитим. Ютубка Эбээ Маайа диэн аатынан киирдим.
Ити остуоруйалыыр идэ бу санаатахха, оҕо сааспыттан кэлбит эбит. Мин остуоруйалыыр дьукаахтыы олорор уолбутугар ымсыыра саныырым. Ону истэ-истэ иһит сууйарым. Онтон ийэм иистэнэр кэмигэр миигин остуоруйалатар буолбута. Ийэм барахсан Анастасия Степановна Павлова тоҕус оҕолоох этэ. Кини кэлин ыалдьан сыппытыгар дойдубар ыарыылыы тиийэн баран, 20-с үйэ кэпсээннэрин, Сэмэн Маайыһап «Ийэм кэпсиир» арамаанын барытын доргуччу ааҕан биэрбитим.
Сытар, дьону кытта сатаан көрсөр кыаҕа суох кырдьаҕастарга маннык ютуб-ханаал олус туһалаах буолуон сөп. Мин бэйэм айар дьоҕус остуоруйаларбын сиэннэрбэр кэпсиибин. Олорбун билиҥҥитэ ютубка таһаара иликпин. Дьон сэҥээрэн эрийэн билсэллэриттэн үөрэбин, ол аата дьон остуоруйаны, сахалыы тылы-өһү сэргиир эбит дии саныыбын.
Бу курдук, Эбээ Маайа ютуб-ханаалыгар 70 араас остуоруйа баар. Киирэн истиҥ, сэргээҥ диэн ыҥырабыт!
Ульяна Захарова, edersaas.ru
Хаартыскалар — дьоруой архыыбыттан.